Një qëndrim zyrtar ka ardhur nga Moska duke bërë të ditur se ka shumë gjasa që Rusia ta këmbejë njohjen e Krimesë nga ana e SHBA-së me njohjen e Kosovës nga Kremlini.
Është senatori rus, Aleksej Pushkov, i cili ka bërë të ditur se tashmë duhet të bëhet e qartë nga ana e Uashingtonit se cila do të jetë oferta e tij për Krimenë.
“Nëse Krimeja është Ukrainë, atëherë Rusia nuk do të lëshojë Kosovën”, shkruan Pushkov në një twit, që duket si mesazh i hapur i Moskës përpara bisedimeve mes Prishtinës dhe Beogradit.
“Unë propozoj që Departamenti i Shtetit, në vend të bërë deklarata në lidhje me Krimenë, të kenë parasysh Kosovën ku pavarësia u bë pa referendum dhe u bombardua Serbia. Pavarësia e Kosovës u arrit me mjete të paligjshme. Ashtu edhe SHBA u nda nga Britania e Madhe, vetëm me armë në dorë, pra në mënyrë të paligjshme. Nuk e njohin rrugën legale”, tha Pushkov, i cili është një anëtar i Dhomës së Lartë ruse, me marrëdhënie të afërta me Kremlinin.
Ndërkaq, Sputnik ka publikuar sot një koment ku akuzon SHBA-në se kërkon ta fusë Ballkanin në NATO duke krijuar një mundësi destabilizimi.
Menjëherë pas takimeve të kreut të Komitetit Ushatar të NATO-s në Beograd, është riaktivizuar propaganda ruse duke paralajmëruar Uashingtonin.
“Tashmë nuk duhet pritur, sidomos nëse shihet nga konteksti i luftës asimetrike të Perëndimit kundrejt Rusisë. SHBA po përpiqet të fusër të gjitha shtetet e Ballkanit me dëshirë ose me dhunë në NATO. Kjo u bë e qartë nga zyrtari i lartë i DASH, Mitchell që vizitoi Prishtinën dhe Beogradin para pak ditësh”, shkruan Sputnik.
“Formimi i Ushtrisë së Kosovës është një kërcënim i qartë për Beogradin dhe ekziston një mënyrë në të cilën do të shfaqet në muajt apo vitet e ardhshme.
Serbia është nën presion dhe sfida mund të rrezikojë Ballkanin”, shprehet Dushan Prorokoviç, drejtuesi i një OJF-je të financuar nga Moska për politikën e Jashtme.
Më tej Sputnik kalon në akuzë direkte ndaj Beogradit:
“Nuk besohet se Thaçi apo Haradinaj kanë bërë për vete serbët e Kosovës. Ata urdhërohen nga Beogradi dhe prej andej ka një sinjal të fortë e të qartë”, shkruan portali i Kremlinit. /tesheshi.com/
