Në çadrën e opozitës tashmë kanë ardhur si aleatë ndërkombëtarë ose politikanë të qarqeve euroskeptike ose të qarqeve që kanë problem me BE-në dhe Gjermaninë në veçanti.
Kështu edhe sot, një nga folësit kryesorë në çadër ishte Zsolt Nemeth, Kryetar i Komisionit të jashtëm të Parlamentit të Hungarisë, anëtar i partisë së kryeministrit Victor Orban.
Partia e Orban ishte gati të përjashtohej nga PPE si pasojë e lidhjeve me Moskën, por pas një kompromisi që u arrit që Orban të anulonte ligjin për arsimin e lartë, çështja u shty.
Nemeth tha sot se lufta e opozitës shqiptare sot është edhe me korrupsionin e ndërkombëtarëve, duke u bërë jehonë deklaratave të mëparshme të Lulzim Bashës, i cili ka akuzuar disa të huaj se janë bërë palë me Edi Ramën dhe se janë paguar me paratë e drogës.
“Unë dua t’ju përcjell sot mesazhin e qeverisë hungareze se sot jemi me ju të dashur shqiptarë. Keni miq në Evropë, s’jeni të vetëm. Dua t’ju përgëzoj për qëndresën 76 ditore, kjo më tregon mua se Shqipëria ka mbërritur në agimin e ri. Si kemi luftuar komunizmin Orban dhe Berisha, s’ka qenë e lehtë por fitorja ka qenë e jashtëzakonshme. Jam i sigurt që e dini se çfarë është më e keqja në komunizëm, lufta juaj sot është me postkomunizmin, dhe internacionalizmi, korrupsioni i ndërkombëtarëve është e keqja më e madhe e postkomunizmit. S’duam të shohim në Evropë një narko-shtet. Do ju mbështesim në luftën tuaj për zgjedhje të liria dhe të ndershme. Do ta arrini atë këtë betejë se e ardhmja juaj është e përbashkët me BE, ne kemi një të ardhme të përbashkët me Evropën”, deklaroi ai.
Dhe me këtë rast, Basha në fjalimin e tij revokoi aleancën e Skënderbeut me Janosh Huniadin kundër osmanëve. /tesheshi.com/
