Një akuzë e fortë ka dalë nga Ambasada Amerikane për pronarët e mediave në Shqipëri, duke u cilësuar ata si “shantazhues biznesesh të huaja”. Ka qenë Shefi i Marrëdhënieve me Publikun në këtë ambasadë, Brian Beckmann, ai i cili në një takim me studentë e pedagogë të Universitetit Bedër ka denoncuar praktikën e shantazheve, ndonëse pa përmendur ndonjë emër apo lënë të nënkuptuar se kush qëndron pas tyre.
“Për fat të keq, ajo që shohim sot në Shqipëri është një hapësirë mediatike që bëhet gjithnjë e më e njëanshme. Më shumë se kurrë më parë, pronarët e mediave kanë një ndikim më të fortë në atë çfarë raportohet dhe se si mbulohet.
Shohim aktorë të këqinj, si këta pronarë apo ata me influencë në këtë vend, të cilët e përdorin median për të kërcënuar me shantazh bizneset ndërkombëtare me qëllim që të dekurajojnë investimet dhe t’i hapin rrugën interesave të tyre personale.
Shohim histori që janë shkruar, jo të bazuara në të gjitha faktet e vlefshme, por në të kundërt, me informacion të pjesshëm, të shtrembëruar që ofrohet për të promovuar interesin e një industrie, partie, një individi kundrejt një tjetri. Ata përdorin median me qëllimin e vetëm që të arrijnë atë që duan”, tha zyrtari amerikan.
Sipas tij, puna në media duhet të udhëhiqet nga një tjetër parim, tjetër praktikë.
“Çdo takim ditor editorial në Shqipëri duhet të fillojë me pyetjen “Cila është historia qe duhet të tregojmë?” dhe jo “Kujt do t’i vihemi nga pas sot? Lajmet duhet të përqendrohen tek e vërteta, dhe jo si mund të përdoret forca e shtypit si një armë kundër një person, biznesi, apo një partie politike”, përgjegjësi për Marrëdhëniet me Publikun në Ambasadën Amerikane. /tesheshi.com/
