Kevin Roberts, president i Fondacionit Heritage dhe arkitekt i Projektit 2025, plani i konservatorëve amerikanë për mandatin e dytë të Trump, është i lidhur ngushtë me Opus Dei, një grup i diskutueshëm katolik.
Roberts pranoi se për vite “në baza javore” ai vizitoi Qendrën Katolike të Informacionit (CIC), të kryesuar nga një prift i Opus Dei dhe të inkorporuar nga Kryepeshkopata e Uashingtonit. Në një fjalim që mbajti në CIC, i cili është i disponueshëm në internet, Roberts shpalosi strategjinë e tij për arritjen e qëllimeve ekstreme politike që ai i mbështet, por që nuk janë në hap me pikëpamjet e shumicës së amerikanëve.
Ndalimi i kontrollit të lindjes është beteja “më e ashpër” politike me të cilën përballen konservatorët në të ardhmen, tha Roberts, duke u kërkuar njerëzve me mendje të njëjtë që të ndjekin edhe fitore të vogla legjislative për të çuar përpara qëllimet e tyre afatgjata të politikës.
Roberts ka fituar famë si udhëheqësi i Projektit 2025, një plan novator i mbështetur nga më shumë se 100 grupe konservatore që synon të ndryshojë rrënjësisht një sërë politikash nëse Trump rizgjidhet: nga kufizimi i aksesit në abortin dhe të drejtat e LGBTQ+, në transformimin e Departamentit të Arsimit, për t’i dhënë fund programeve të diversitetit dhe për të rritur mbështetjen e qeverisë për programet e “ndërgjegjësimit të fertilitetit” (të cilat përfshijnë gjurmimin e ovulacionit dhe praktikimin e abstinencës me ndërprerje, në vend të kontracepsionit më të besueshëm).
Lidhjet personale të Roberts me Opus Dei nuk kanë qenë në qendër të vëmendjes deri më tani.
Gareth Gore, autor i një libri mbi Opus Dei, e quajti organizatën katolike “një projekt politik të mbështjellë me një vello shpirtërore të Krishtit.”
“Ashtu si Projekti 2025, Opus Dei përfaqëson një qëndrim reaksionar kundër lëvizjes progresive të shoqërisë,” tha Gore. Për dekada, organizata ka siguruar fonde të konsiderueshme për të arritur elitën politike dhe ligjore të Uashingtonit. Ajo duket se më në fund ia ka arritur këtë falë bashkëpunimit të ngushtë me njerëz si Kevin Roberts dhe Leonard Leo.
Leo është një aktivist konservator që udhëhoqi përpjekjet republikane për të instaluar një shumicë të krahut të djathtë në Gjykatën e Lartë dhe financon shumë nga grupet që nënshkruan në Projektin 2025. Ashtu si Roberts, Leo është i lidhur me CIC dhe Opus Dei. Kur mori nderimin më të lartë të CIC në 2022, ai i quajti kundërshtarët e tij politikë “barbarë të poshtër dhe amoralë, laikë dhe fanatikë nën ndikimin e djallit”.
Demokratët, përfshirë Kamala Harris, ngritën alarmin për Projektin 2025 për të paralajmëruar votuesit se çfarë mund të bëjë një administratë tjetër Trump.
“Trump dhe Projekti i tij ekstrem 2025 do të dobësojnë klasën e mesme. Ne duhet ta marrim këtë seriozisht. A mund ta besoni se ata kanë shkruar të gjitha këto? Lexojeni. Janë 900 faqe,” tha Harris këtë javë në tubimin e saj të parë të fushatës.
Distanca e Trumpit
Trump, megjithatë, është përpjekur të distancohet nga projekti, edhe pse është i lidhur ngushtë me njerëzit që qëndrojnë pas tij dhe politikat e të cilëve shpesh janë në përputhje me idetë e Trumpit.
Roberts tha se ai është “mik i mirë” me J.D. Vance, kandidati për zv/president i Trumpit. Ai vetë tha se Projektit 2025 përmban “disa ide të mira”. Vance, i cili u konvertua në katolicizëm në vitin 2019, tha në parathënien e librit të ardhshëm të Roberts se autori artikulon “një të ardhme vërtet të re për konservatorizmin”.
Opus Dei nuk zbulon emrat e anëtarëve të saj. Grupi u themelua në Spanjë në fillim të shekullit të 20-të si një përgjigje ndaj konfliktit midis katolikëve konservatorë dhe socializmit e komunizmit antikatolik në Spanjë. Papa konservator Gjon Pali II mbështeti Opus Dei-n dhe e konsideroi atë një përgjigje ndaj rritjes së teologjisë çlirimtare në Amerikën Latine dhe i dha një status të veçantë. Por disa nga ato të drejta të veçanta të Opus Dei u hoqën nga Papa Françesku më përparimtar.
Një nga parimet themelore të Opus Dei është se ai nuk beson në ndarjen tradicionale të kishës nga shteti. Në vend të kësaj, tha Massimo Faggioli, një profesor i teologjisë dhe studimeve fetare në Universitetin e Villanovas, ai beson se kisha dhe shteti duhet të jenë në simbiozë.
SHBA në një udhëkryq
Dhe Roberts e bëri të qartë se ai beson se SHBA është në një udhëkryq dhe “në procesin e një revolucioni të dytë amerikan, i cili do të jetë pa gjak nëse e majta e lejon atë”.
I pyetur për të komentuar fjalët e Roberts dhe Projektin 2025, një zëdhënës i Opus Dei tha: “Opus Dei është një institucion i Kishës Katolike që përpiqet të ndihmojë njerëzit të afrohen më shumë me Zotin në punën e tyre dhe në jetën e tyre të përditshme. Qëllimet e Opus Dei janë thjesht shpirtërore dhe (organizata) nuk mbështet dhe nuk ka ndonjë mendim për ndonjë projekt politik”.
Duket se lidhjet e Roberts me Opus Dei nuk janë të kufizuara në CIC. Shkolla e themeluar nga Roberts në Luiziana, e quajtur Akademia e Gjon Palit të Madh, e konsideron themeluesin e Opus Dei Escriva “patron” të saj. Roberts ishte gjithashtu i përfshirë në programet e shkollave afër Opus Dei në Austin, Teksas. Një faqe interneti që gjurmon aktivitetet e burrave të Opus Dei e quajtur “Where You Are” thotë se Roberts është vullnetar dhe “kontribuon ndjeshëm” në karrierën dhe programet e lidershipit të shkollës.
Roberts ishte gjithashtu i ftuar në një shkollë tjetër të lidhur me Opus Dei, Camino Schools, në vitin 2023. Përpara fjalimit të Roberts, drejtori i shkollës, Bob Rose, vlerësoi shkollat që u mësojnë djemve dhe vajzave se janë “të ndryshëm”, mësojnë ndryshe dhe frymëzohen nga gjëra të ndryshme, ku djemtë mësohen nga “burra burrërorë” që shërbejnë si model. Kritikët e Roberts thonë se shqetësimet për lidhjet e tij me Opus Dei nuk kanë të bëjnë fare me bindjet e tij si katolik romak.
“Kevin Roberts, si të gjithë amerikanët, ka lirinë e besimit të garantuar me kushtetutë,” tha Lisa Graves, bashkëthemeluese e Përgjegjshmërisë së Gjykatës, një grup jopartiak që lufton korrupsionin në gjyqësor.
“Megjithatë, ajo që është shqetësuese është se si disa elita të fuqishme, pjesë e së cilës është Roberts, po përdorin fuqinë e degës ekzekutive për të imponuar pikëpamjet e tyre fetare personale si ligj të detyrueshëm për amerikanët e tjerë – ndalimin e abortit, përdorimin e qeverisë për të miratuar metoda të caktuara të kontracepsionit, madje dhe ndalimi i përmendjes së prezervativëve në bisedat për shëndetin e grave, si dhe shkeljen e të drejtave të amerikanëve LGBTQ+”.
Gjatë fjalimit të Roberts në shtator 2023, i cili kaloi kryesisht pa u vënë re në atë kohë, por u postua në faqen e qendrës në YouTube, Roberts detajoi se si katolikët konservatorë dhe aleatët e tyre mund të avanconin politikën amerikane dhe t’i jepnin fund aksesit ndaj abortit, martesës së të njëjtit seks dhe kontracepsionit.
Duke ditur se sa i papëlqyeshëm është ndalimi i kontrollit të lindjes – një betejë politike edhe më e ashpër sesa ndalimet e abortit dhe martesat e homoseksualëve – ai inkurajoi një qasje graduale për arritjen e këtij qëllimi afatgjatë.
“Edhe në një mjedis politikisht konservator, mund të jetë shumë e vështirë të arrish përparim,” u tha Roberts të pranishmëve në veprimtarinë e CIC. /tesheshi.com/
