Raul Gonzales, njeriu që përfaqëson OBSH-në në Shqipëri, ka sqaruar se ç’ka dashur të thotë eprori i tij në Gjenevë, Dr. Tedros Adhanom Ghebreyesus, me tezën “Test, test, test”. Kujtojmë se këtë tezë, opozita në Shqipëri po përdor së fundi dhe si kartë në akuzat e saj ndaj qeverisë, duke pretenduar për mungesë kapacitetesh. Ky detaj ishte dhe në letrën e Bashës drejtuar Gonzalesit. Por ky i fundit, në një intervistë për TCH, sqaroi, edhe për Bashën, se ç’nënkupton ajo çfarë ka thnënë kreu i OBSH-së.
“Unë do t’i rekomandoja gjithsecilit ta dëgjojnë të gjithë fjalinë e thënë nga kreu OBSH-së katër ditë më parë. Po, ai e thotë ‘test, test, test’, të rasteve të dyshuara. Pra të rasteve të dyshuara. Ne nuk jemi përballë mundësisë të shkojmë e të bëjmë një testim të përgjithshëm të popullsisë.
Është e nevojshme një testim racional dhe secili shtet, duhet të analizojë situatën epidemiologjike duke marrë masat e duhura. Testimi në vetvete nuk shëron. Testi në vetvete nuk parandalon. Testi në vetvete na ndihmon të kuptojmë evulimin e epidemisë.
Masat më e rëndësishme janë ato që ne po shikojmë në Shqipëri: distancimi social. Dhe unë mund të them: distancim social, distancim social, distancim social. Ky është i vetmi instrument që ne kemi i provuar që është efektiv përballë sëmundjes”, tha Gonzales.
Ndërkohë, edhe pse nuk e ka përmendur letrën e Bashës, me kërkesën e këtij të fundit që OBSH të ndihmojë Shqipërinë për furnizim me pajisje mjekësore, Gonzales ka sqaruar kreun e opozitës duke bërë të qartë se ai është më afër realitetit dhe e ka të qartë se ç’po ndodh në terren.
“Ne po punojmë nga afër me qeverinë shqiptare e në veçanti me Ministrinë e Shëndetësisë. Janë marrë disa masa të rëndësishme se çfarë mund të ndodhë në të ardhmen me shërbimin shëndetësor.
Qeveria ka hapur një tender për blerje aspiratorësh që janë vendimtarë për shërbimin intensiv në spitale. Sikurse mbrojtja e personelit mjekësor duke siguruar një buxhet për të këtë e ofruar trajnimin e domosdoshëm për ata”, tha zyrtari i OBSH-së. /tesheshi.com/
