Një deklaratë e pazakontë ka ardhur nga ambasadori rus në Tiranë, Alexandër Karpushin, i cili e ka quajtur si “famëkeq” solidaritetin euroatlantik që tregon Shqipëria, duke injoruar tërësisht Rusinë, qoftë dhe për marrëdhënie ndërkombëtare.
“Për fat të keq, më duhet të pranoj se bashkëpunimi në fushën tregtare dhe ekonomike midis vendeve tona është praktikisht në nivelin zero dhe nga kjo pësojnë humbje, në radhë të parë, qytetarët dhe rrethet e biznesit të vendit tuaj.
Sot, pala shqiptare nuk ka ndonjë interes pragmatik për të ndërtuar marrëdhënie reciproke të dobishme me Rusinë. Krijohet një përshtypje se politika e jashtme e shtetit tuaj ndodhet nën një ndikim të lartë nga forca të treta.
Përveç kësaj, Shqipëria, për të justifikuar qëndrimin e saj, i referohet solidaritetit famëkeq euroatlantik, por po ai anëtarësim në NATO dhe BE nuk e pengon Italinë, Slloveninë, Greqinë apo shumicën dërrmuese të vendeve evropiane për të bashkëpunuar dhe zgjeruar në mënyrë aktive bashkëpunimin me Rusinë.
Pse Shqipëria nuk mund të bashkëpunojë?
Por kjo është një pyetje që ju duhet t’ua drejtoni vetë drejtuesve tuaj”, ka thënë Karpushin në një intervistë për A1 Report.
Ai githashtu hodhi poshtë çdo akuzë që mund t’u adresohet politikanëve apo drejtuesve të shtetit shqiptar, për aleanca të fshehta me rusët, që mbështeten nga Moska, apo punojnë për të.
“Sigurisht, ne jemi të habitur nga akuzat e pajustifikuara në adresë të Rusisë, të shfaqura kohët e fundit në mediat lokale dhe në deklaratat e një numri të liderëve shqiptarë, për ‘rritjen e ndikimit të Rusisë në Shqipëri’ në një kontekst negativ, si edhe përpjekjen për të destabilizuar situatën në vendin tuaj.
Të gjitha forcat politike në vend i përdorin këto përralla, duke sakrifikuar në këtë mënyrë mundësinë e zhvillimit të bashkëpunimit tonë për luftën ndërpartiake.
Shumica dërrmuese e shqiptarëve, me të cilët kontaktoj për shkak të detyrës, janë të vetëdijshëm për ndikimin e vërtetë që ushtrohet ndaj qeverisë tuaj edhe nga ana e ambasadave të aleatëve tuaj.
Ndoshta, dikush ndjen keqardhje që ambasada ruse nuk sillet në të njëjtën mënyrë, por një praktikë e tillë, siç e thashë, është në kundërshtim me parimet tona”, theksoi Karpushin. /tesheshi.com/
