Presidenti amerikan Donald Trump emëroi të mërkurën Andrew Puzder, ish-drejtorin ekzekutiv të kompanive të ushqimit të shpejtë Hardee’s dhe Carl’s Jr., si ambasador të SHBA-së në BE, e po ahtu emëroi në krye të Shërbimit Sekret agjentin që ishte i pranishëm gjatë tentativës për vrasjen e tij në Pensilvani.
“Andy është një avokat, biznesmen, komentator ekonomik dhe autor më i shitur”, shkroi Donald Trump në platformën e tij Truth Social.
“Në vitin 2000, ai u emërua CEO i CKE Restaurants, kompania mëmë e zinxhirit ndërkombëtar të restoranteve të ushqimit të shpejtë Carl’s Jr. and Hardee’s. Gjatë 17 viteve të tij në krye, Andy e tërhoqi kompaninë nga një situatë e vështirë financiare dhe i mundësoi sukses”, shtoi Trump.
Sipas tij, “Andy do të bëjë një punë të shkëlqyer duke përfaqësuar interesat e kombit tonë në këtë rajon të rëndësishëm.”
Presidenti i ri i vjetër amerikan ka një marrëdhënie shumë të vështirë me Bashkimin Evropian, kujton AFP.
“BE është shumë e keqe për ne. Evropianët na trajtojnë shumë keq, nuk i pranojnë makinat dhe produktet tona bujqësore. Në fakt, pothuajse asgjë. Pra, ata do të jenë të mirë për tarifat, kjo është mënyra e vetme (…) ata do të kenë një marrëveshje të drejtë”, kamentuar Trump.
Gjatë fushatës së tij presidenciale, Trump dënoi ashpër deficitin tregtar me Bashkimin Evropian dhe e krahasoi bllokun 27-vendesh me një “Kinë të vogël” që përfiton nga fuqia kryesore ekonomike në botë.
Në mandatin e tij të parë, Trump emëroi Puzderin për Sekretarin e Punës në vitin 2017, por ai nuk ishte në gjendje as të merrte detyrën sepse u tërhoq për shkak të skandaleve të shumta.
Ish-gruaja e tij e akuzoi për dhunë në familje, por më vonë i tërhoqi akuzat. Ai pranoi se kishte punësuar një amvise në mënyrë të paligjshme. Ai ka punuar si avokat në shtetin e Misurit dhe njihet si kundërshtar i abortit. Emërimi i tij duhet të konfirmohet nga Senati.
Trump emëroi gjithashtu Sean Curran, një agjent i cili ishte i pranishëm gjatë atentatit të korrikut ndaj tij në Pensilvani, në krye të Shërbimit Sekret, përgjegjës për mbrojtjen e figurave të larta politike në Shtetet e Bashkuara.
“Sean është një patriot i madh që ka mbrojtur familjen time gjatë disa viteve të fundit, prandaj i besoj atij që të udhëheqë burrat dhe gratë e guximshme të Shërbimit Sekret”, tha presidenti amerikan në platformën e Truth Social. “Ai dëshmoi guximin e tij kur rrezikoi jetën e tij për të shpëtuar timen nga plumbi i një vrasësi në Butler, Pensilvani,” shtoi ai.
Donald Trump i shpëtoi me vështirësi një atentati më 13 korrik, kur një i ri qëlloi kandidatin republikan në mes të një tubimi, duke e plagosur në vesh, duke vrarë mbështetësin e tij dhe duke plagosur dy të tjerë. Sulmuesi, Thomas Matthew Crooks, 20 vjeç, u qëllua nga Shërbimi Sekret pak pasi ai hapi zjarr nga çatia e një ndërtese aty pranë.
Imazhet e Donald Trump, gjaku i rrjedhur në fytyrë dhe grushtat e ngritur, janë bërë virale në mbarë botën dhe ngjarja është parë si një moment kyç në fushatën presidenciale. Kjo çoi gjithashtu në dorëheqjen e Drejtoreshës së Shërbimit Sekret Kimberly Cheatle. /tesheshi.com/
