Aleksandar Vulin, ish-ministër i Policisë në Qeverinë e Serbisë, është emëruar sot drejtor i shërbimit informativ serb BIA. Sipas Vecernje Novosti të Beogradit, Vulin është zgjedhur sot në atë pozitë në seancën e Qeverisë së Serbisë.
Kujtojmë se Vulin njihet për deklaratat e tij se mbron dhe beson në krijimin e një “Bote Serbe”. Sipas tij, “e vetmja mënyrë që Ballkani të mbetet stabil është që serbët të jetojnë në një shtet”.
Ai vazhdimisht ka thënë se beson në nevojën e bashkimit të të gjithë serbëve si një komb i vetëm politik, duke shtuar se “uniteti krijohet në Serbi, në Beograd”.
“Serbia është ajo që i mbledh të gjithë serbët dhe që mendon se si do të transferohet një vendim tek serbët në Kosovë, serbët në RS dhe nëse vëllezërit tanë në Kroaci do të vuajnë apo jo për shkak të diçkaje. Kjo do ndodhë dhe me serbët në Mal të Zi apo në Maqedoninë e Veriut”, tha Vulin në fillim të këtij viti për televizionin BN.
Vetëm një politikë e tillë, thotë ai, garanton mbijetesën e popullit serb.
“Krijimi i një ‘Bote Serbe’ është detyrë e brezit tim”, përfundoi Vulin me atë rast. /tesheshi.com/
