Visar Sutaj nga KDI: Kreu i Antikorrupsionit Hasan Preteni të japë llogari për fjalorin që përdor ndaj shoqërisë civile
Nga Blendi Gashi
Drejtori i Agjencisë Kundër Korrupsionit (AKK), Hasan Preteni përmes një letre ka fyer stafin e Institutit Demokratik të Kosovës (KDI), duke i quajtur si “të pamerituar”, “të paedukuar” dhe “hipokrit,” duke aluduar që nuk ishte i ftuar në një konferencë rajonale të organizuar më 4 shkurt në Prishtinë, gjë që është mohuar nga KDI.
Preteni, personalisht i ka dërguar një letër hulumtuesit të KDI-së, Visar Sutaj, duke i thënë: “I ke y rrugë, o puno me nder dhe drejtësi, ose gënje, shantazho dhe shërbeju profiterëve. Në rrugën e parë ke rrugëtimin e parë 10-vjeçarë të agjencisë, rruga e dytë të dërgon në humnerë”.
KDI në reagimin e saj bërë dje ka thënë se nuk është hera e parë që kreu i AKK-së, përdorë gjuhë të urrejtjes ndaj shoqërisë civile, të cilët e vlerëson agjent për shantazhim dhe shërbim të profiterëve.
Ndaj fjalorit të Pretenit ka reaguar edhe deputetja e VV-së, Albulena Haxhiu, njëherit kryetare e Komisionit për Legjislacion, e cila ka thënë se në vazhdimësi ka kritikuar qasjen e AKK në raport me shoqërinë civile, duke thënë se ofendimet dhe qasja e tillë e drejtorit të AKK-së duhet të ndërpriten, pasiqë paaftësia ose mosvullneti për të luftuar korrupsionin në vend, nuk mund të fshihet duke ofenduar ata të cilët janë kritikë karshi dështimeve në luftën kundër korrupsionit.
Tesheshi.com ka zhvilluar një bisedë me Sutajn e KDI-së për të marrë qëndrimin e tij për fyerjet e bëra nga Preteni, në drejtim të tij dhe organizatës ku ai punon.
Sutaj, në këtë intervistë ka treguar se KDI së shpejti do të dalë me një analizë politike ku do të flet edhe për Agjencinë Anti-Korrupsion.
Drejtori i Antikorrupsionit, Hasan Preteni, përmes një letre ka shprehur reagimin e tij për siç thotë mosthirrjen në një konferencë të organizuar nga KDI. Pra, ta sqarojmë për publikun ka qenë apo jo i ftuar në konferencë. Nëse po, cila është arsyeja që ai thotë të kundërtën?
Po, z. Preteni ka qenë i ftuar në konferencë.
Qasja e tij është që shoqëria civile nuk i shërben interesit publik dhe se nuk është kompetente me luftu korrupsionin. Pra, ka shumë rezerva ndaj shoqërisë civile. Pavarësisht, kërkesave tona me ndërtu bashkëpunim me të, ai gjithmonë na ka ikur dhe kjo nuk është vetëm qe dy vite sa punoj unë në KDI, por edhe më herët.
Kjo është një lloj injorance ndaj shoqërisë civile, jo vetëm ndaj KDI-së por edhe ndaj organizatave tjera si ÇOHU-t. Ka edhe padi ndaj tij që ka bërë shoqëria civile. Pra, ka një qasje shumë agresive ndaj neve.
Nuk e di çka mund ta shtyjë ta ketë këtë qasje, por ndoshta është thjesht tip institucional që nuk beson se shoqëria civile e ka vendin me luftu korrupsionin, ose edhe mundet me pas ndonjë arsye tjetër.
Preteni, personalisht ju ka fyer juve z. Sutaj, por edhe drejtorin e KDI-së. Pse, kjo gjuhë urrejtje ndaj jush konkretisht. Keni ndonjë inat mes vete?
Më shumë e ka pasur me drejtorin e KDI-së. Ka pas ‘lufta’si kjo edhe më herët ku i referohet paraardhësve të mij, pra Merita Mustafës që tash është në ‘Vetëvendosje’.
A do të kërkoni nga Komisioni parlamnetar për legjislacion të veprojë brenda kompetencave dhe të mbajë përgjegjës udhëheqësin e AKK-së?
Ne kemi kërkuar nga Komisioni kuvendari për Legjislacion të merretme këtë çështje. Kjo qasje e tij është jo e mirë ndaj shoqërisë civile. Na kena lyp një llogari më të lartë.
Ne si shoqëri civile kemi kërkuar që ky njeri të mbahet më llogaridhënës. Nuk kemi kërkuar ndonjë dorëheqje pasi është afër ta përfundojë mandatin.
Përmes reagimit tonë simbolik kemi dashur të tregojmë se çfarë njerëz udhëheqin institucionet kyçe në Kosovë.
Mund të shkojmë me kërkesë të dorëheqjes por një gjë e tillë kanë tregu jo rezultate të mira në të kaluarën.
Ne, KDI do të bëjmë një analizëpolitike që do të kritikon Agjencinë Kundërkorrupsion për mos luftën ndaj korrupsionit.
Ai ju ka akuzuar se keni kritikuar AKK-në duke thënë se nuk ke mundur t’i argumentosh mangësitë. Çfarë keni thënë ju që aq shumë e ka bërë të reagoj kaq ashpër Pretenin?
Në konferencë KDI ka thënë se Agjencisë Kundërkorrupsion i mungon baza ligjore dhe financat për me kry punën e saj. Baza ligjore në kuptimin se kanë të drejtë me bërë hetime preleminare. Ndërsa, ana e financave është se me një buxhet 500 mijë euro nuk luftohet korrupsioni. Faji është tek Qeveria dhe vullneti politik.
Personalisht ju, si e vlerësoni punën e Pretenit dhe agjencisë që drejton?
Kritika më shumë është te Agjencia, nuk kam asgjë personale me Pretenin. Kjo, agjenci edhe pse funskionin qe disa vite ka dështuar ta luftojë krimin dhe korrupsionin për shkak të mungesës së vullnetit politik.
Deklaruat se do ta publikoni një analizë politike, ç’farë do të ketë në fokus ajo?
Analiza tregon problemin që ekziston në Kosovë që mga paslufta, ku kemi një politikë ose me qëllim ose për shkak të mosditurisë së saj është duke kriju institucione të cilat janë kompetente për me kry punën e saj në luftën kundër korrupsionit duke filluar nga Agjencia Anti-korrupsion.
Do të dalim me disa rekomandime, se është më mirë me u fuqizu Agjencia Anti-korrupsion, ose ështëmë mirë me u asgjësu kjo Agjenci, ose së paku Departamentit për hetime me iu zbeh kompetencat dhe në të njëjtën kohë me fuqizu Prokurorinë sepse krejt problem është tek Prokuroria.
Nëse Prokuroria do të bënte punën e saj, nuk kish pas nevojë AKK me lufimin e korrupsionit, dhe do të mund të merrej vetëm me kompetencat e deklarimit të pasurisë.
/tesheshi.com/
