Një zbulim magjepsës në Marok

Arkeologët në Marok kanë zbuluar më shumë se 80 gjurmë njerëzore që datojnë rreth 100,000 vjet më parë dhe besohet se janë më të vjetrat në Afrikën e Veriut.

Gjurmët e këmbëve, ndoshta të lëna nga pesë qenie njerëzore, përfshirë fëmijë, u zbuluan në bregun e Larache, një qytet 90 kilometra në jug të Tangier, nga arkeologë nga Maroku, Spanja, Franca dhe Gjermania.

“Ky grup po kalonte plazhin drejt detit, ndoshta në kërkim të ushqimit dhe butakëve,” i tha AFP Anass Sedrati, kurator në sitin arkeologjik Lixus Larache.

“Ata ishin ndoshta peshkatarë ose grumbullues.”

Studiuesit, hulumtimi i të cilëve u botua në revistën shkencore Nature në janar, thanë se është fjala për disa nga gjurmët njerëzore më të ruajtura në botë dhe më të vjetrat në Afrikën e Veriut dhe Mesdheun jugor.

“Këto zbulime u bënë gjatë një misioni në terren në korrik 2022, si pjesë e një projekti kërkimor shkencor mbi origjinën dhe dinamikën e shkëmbinjve të shpërndarë përgjatë bregut”, thanë studiuesit e udhëhequr nga Université Bretagne Sud të Francës.

Gjurmët e këmbëve

Në vitin 2017, mbetjet që datojnë 300,000 vjet më parë, u gjetën në Marokun veriperëndimor, një zbulim që e shtyu fillimin e vlerësuar të qenieve njerëzore me 100,000 vjet.

Gjurmët në Larache ishin dëshmi e mëtejshme e rëndësisë së rajonit në historinë njerëzore, tha Anass Sedrati, duke vënë në dukje se gjurmët e kafshëve u gjetën gjithashtu.

“Ne duhet ta ruajmë këtë trashëgimi të jashtëzakonshme, edhe nëse kërcënohet nga ngritja e nivelit të detit dhe stuhitë”, tha Mouncef Sedrati, drejtues i projektit kërkimor, transmeton Sciencealert. /tesheshi.com/