Në Danimarkë po ndërtohet një xhami e re që ka për të veçantë emrin e saj, “Hagia Sofia”, siç quhet pra ish-katedralja e famshme e Stambollit, si dhe faktin se në nisjen e punimeve të saj ka marrë pjesë një peshkop dhe kryebashkiaku lokal.
Ajo mund të përfundojë në fillim të vitit 2018, pavarësisht se nga ana tjetër po shqqërohet nga protesta të aktivistëve anti-Islam.
Vendi ku do të ndërtohet xhamia ndodhet në Roskilde, një qytet 30 kilometra në perëndim të Kopenhagenit me gati 50,000 banorë. Tuncay Yilmaz, kreu i shoqatës jofitimprurëse të xhamisë, tha se ndërtimi nisi në shkurt të vitit 2016 me pjesëmarrjen e kryebashkiakut të Roskilde-s, Joy Mogensen dhe peshkopit Peter Fischer-Moller, e do të përfundojë në shkurt të vitit të ardhshëm.
Duke deklaruar se plani i saj i ndërtimit ishte miratuar nga këshilli bashkiak, Yilmaz tha se protestuesit pohonin se ezani, thirrja islame për namaz, do të mund të thirrej nga minaret e xhamisë në të ardhmen.
“Por ne nuk kemi asnjë ide të tillë,” tha Yılmaz.
Aktet nënligjore lokale nuk lejojnë që ezani të thirret nga minaret.
Disa protestues që i përkasin organizatave anti-islame, të tilla si Stop Islamizimit të Danimarkës, i themeluar në vitin 2005, më herët kishin vënë në shënjestër të kritikave kryebashkiakun dhe peshkopin e Roskildit.
Aktivistët lëshuan një regjistrim me zë të lartë të ezanit para shtëpive të Mogensen dhe Moller në orët e hershme në korrik. Një shërbim i kryer nga peshkopi në një katedrale lokale u ndërpre gjithashtu nga një protestë e ngjashme në muajin gusht. /tesheshi.com/
