Bisedimet dypalëshe midis Turqisë dhe Greqisë mbi mosmarrëveshjet e zgjatura detare, të cilat rinisën të hënën pas një ndërprerje 5-vjeçare, u zhvilluan në një “atmosferë shumë pozitive”, tha të mërkurën ministri i Jashtëm turk Mevlut Çavusoglu.
Vendet fqinje dhe anëtarët e NATO-s zhvilluan 60 raunde bisedimesh nga 2002 në 2016 për të zgjidhur mosmarrëveshjet mbi të drejtat e energjisë dhe pretendimet për ujërat mesdhetare, hapësirën ajrore dhe statusin e disa ishujve të Egjeut, por me pak progres, njoftoi Reuters.
Negociatat rinisën në Stamboll të hënën, pas muajsh tensioni dhe presioni nga Bashkimi Evropian.
Cavusoglu foli në një konferencë të përbashkët shtypi në Ankara me homologun e tij irlandez Simon Coveney.
Çavusoglu tha se bisedimet u përqëndruan në “atë që u diskutua në 60 raundet e para” dhe i bëri thirrje Greqisë të përmbahet nga “provokimet” në një kohë kur Ankaraja po përpiqet të krijojë marrëdhënie pozitive me BE. /tesheshi.com/
