Në prag të 1-vjetorit të grushtit të dështuar të shtetit në Turqi, ambasadori turk në Tiranë, Hidayet Bayraktar ka paralajmëruar sërish për rrezikun që mund t’i kanoset Shqipërisë nga organizata FETO.
Sipas tij, nuk ka asnjë dyshim që pas asaj çfarë ndodhi 15 korrikun e një viti më parë, ku mbetën të vdekur me dhjetra njerëz në mbrojtje të vendit dhe demokracisë, qëndronte kjo organizatë.
“Është e qartë se pas kësaj tentative gjakatare të mbrëmjes së 15 korrikut ishin Fetuhllah Gyleni dhe pasuesit e tij…”
“Ne jemi të vendosur të luftojmë kundër FETO-s në kuadrin e sundimit të ligjit, moralit dhe demokracisë, të cilat janë tri vlerat që ata i nënvlerësojnë më shumë se çdo gjë. Jemi përballë një strukture që ka si objektiv pushtetin dhe sundimin në nivel global…”
“Autoritetet dhe opinioni publik shqiptar duhet të jenë të gatshëm përballë veprimtarisë së kësaj organizate dhe para së gjithash të institucioneve të saj arsimore. Duhen marrë sa më shpejt të gjitha masat e nevojshme dhe duhen tharë burimet e tyre financiare…”
“Dëshirojmë që ajo qe ndodhi në Turqi të mos ndodhë në Shqipëri…”, tha ndër të tjera ambasadori Bayraktar, gjatë një konference të posaçme për shtyp. /tesheshi.com/
