Në përvjetorin e rebelimit nw Capitol më 6 janar 2021, Presidenti Biden e filloi fjalimin e tij drejtuar kombit e thënë se “demokracia u sulmua, thjesht u sulmua atë ditë”.
Ai vlerësoi institucionet e zbatimit të ligjit “që shpëtuan shtetin e së drejtës”.
E vërteta për rebelimin
Presidenti Biden tha se amerikanët duhet të përballen me të vërtetën për rebelimin në Capitol më 6 janar 2021, në mënyrë që të mund të ecin përpara dhe të largohen nga këto ngjarje traumatike.
Biden aludoi në komentin e përfaqësuesit republikan Andrew Clyde, i cili i përshkroi trazirat si një “vizitë normale turistike”.
“Nuk ishte një grup turistësh, ishte një rebelim i armatosur. Ata nuk donin të mbështesnin vullnetin e popullit. Ata donin të mohonin vullnetin e popullit”, theksoi Biden.
Ai tha se të gjithë amerikanët panë se çfarë po ndodhte atë ditë – një turmë që theu xhamat, sulmoi oficerët e policisë dhe hyri në Capitol.
“Kjo nuk ka të bëjë me ‘ngecjen’ në të kaluarën. Kjo ka të bëjë me sigurimin që e kaluara të mos varroset dhe të mos fshihet nga sytë e njerëzve. Kjo është e vetmja rrugë përpara. Kjo është ajo që po bëjnë kombet e mëdha. Ata nuk po varrosin, ata po përballen me të”, tha ai.
Presidenti Biden tha se populli amerikan dhe ligjvënësit duhet të vendosin se çfarë lloj kombi duan të jenë Shtetet e Bashkuara.
Ai shtoi se këta njerëz “nuk kanë ardhur këtu nga patriotizmi apo parimi”.
“Ata erdhën këtu të inatosur. Jo për t’i shërbyer Amerikës, por për të qenë në shërbim të një njeriu”, tha Biden, duke aluduar për ish-presidentin Donald Trump.
Ai shtoi se ata që nxitën turmën ishin komplotistët e vërtetë, të cilët dëshpërimisht po përpiqeshin t’ua mohonin qytetarëve konfirmimin e zgjedhjeve dhe të sfidonin vullnetin e votuesve.
Më herët në fjalimin e tij, Biden tha se amerikanët nuk mund ta duan vendin e tyre vetëm kur u përshtatet.
“Nuk mund ta duash vendin tënd vetëm kur fiton. Nuk mund t’i bindesh ligjit vetëm kur të përshtatet. Nuk mund të jesh patriot nëse pranon dhe lejon gënjeshtra”, tha ai.
Presidenti amerikan i përshkroi burrat dhe gratë që sulmuan Capitol-in e SHBA një vit më parë si një kërcënim të rrezikshëm për demokracinë amerikane.
Edhe pse Biden përmendi vazhdimisht veprimet e ish-presidentit Trump më 6 janar 2021 dhe ditët që çuan në rebelimin vdekjeprurës në Capitol, ai asnjëherë nuk e përmendi emrin e tij.
Biden përshkroi se si, “ish-presidenti ishte ulur në një dhomë ngrënieje private pranë Zyrës Ovale në Shtëpinë e Bardhë ndërsa kryengritja po zhvillohej, duke parë të gjitha në televizor dhe duke mos bërë asgjë për orë të tëra ndërsa policia sulmohej, jeta ishte në rrezik dhe zemra e shtetit ishte nën rrethim”.
“Kjo është e vërteta e vetme. Ish-presidenti i Shteteve të Bashkuara krijoi dhe përhapi një rrjet gënjeshtrash për zgjedhjet e 2020. Ai e bëri këtë sepse fuqia e tij është mbi parimet. Sepse ai e sheh interesin e tij më të rëndësishëm se interesat e vendit të tij. Egoja e tij e thyer është më e rëndësishme se demokracia apo kushtetuta jonë”, nënvizoi Biden në fjalimin e tij.
Presidenti Biden e përfundoi fjalimin e tij duke thënë se 6 janari “nuk shënon fundin e demokracisë, por fillimin e rilindjes së lirisë dhe lojës së ndershme”.
“Mos u mashtroni. Dhimbja dhe plagët pas asaj dite mbeten të thella,” tha Biden, duke shtuar:
“Ne po luftojmë për shpirtin e Amerikës dhe me hirin e Zotit do ta fitojmë këtë betejë”. /tesheshi.com/
