Lufta mes Hamasit dhe Izraelit ka mbërritur deri te Panairi i Librit të Frankfurtit pas polemikave të shkaktuara nga shtyrja e një çmimi për një autore palestinez.
Organizatorët e panairit dënuan sulmin e Hamasit më 7 tetor, të cilit Izraeli po i përgjigjet me një bombardim masiv të Rripit të Gazës.
Panairi është “në solidaritet të plotë me Izraelin”, tha drejtori Juergen Busch në një deklaratë. Programi i panairit u modifikua më pas për t’i dhënë rëndësi më të madhe zërave hebrenj.
Megjithatë, reagime ka shkaktuar shtyrja e ceremonisë së ndarjes së çmimit për shkrimtaren palestineze Antanya Sibley.
Sibley do të nderohej gjatë Panairit të Librit me çmimin letrar LiBeraturpreis, dhënë nga organizata Litprom, e cila promovon autorë të huaj të botuar në gjermanisht. Sibley fitoi çmimin e këtij viti për librin e saj “Detaje të parëndësishme”, i cili i referohet një rasti të njohur që përfshin përdhunimin dhe vrasjen e një vajze beduine në vitin 1949 nga një njësi e ushtrisë izraelite.
Ky libër u botua fillimisht në vitin 2017, dhe tre vjet më vonë u përkthye në anglisht dhe u nominua për Çmimin Booker dhe Çmimin Kombëtar të Librit. Në vitin 2022 u përkthye në gjermanisht dhe këtë vit fitoi LiBeraturpreis, një çmim vjetor që u jepet grave shkrimtare nga Azia, Afrika dhe Amerika Latine. Çdo vit ceremonia e ndarjes së çmimeve zhvillohet në Panairin e Librit në Frankfurt.
“Për shkak të luftës së nisur nga Hamasi, për shkak të së cilës po vuajnë miliona njerëz në Izrael dhe Palestinë, organizatori Litprom ka vendosur të mos e mbajë ceremoninë e ndarjes së çmimeve për LiBeraturpreis në Panairin e Librit në Frankfurt”, thuhet në një deklaratë të organizatës.
Si përgjigje, më shumë se 1000 personalitete nga bota e letërsisë dhe botimit publikuan një letër të hapur proteste.
Organizatorët po “heshtin një zë palestinez”, ankohet letra. “Panairi i Librit në Frankfurt ka përgjegjësinë, si panair i madh i librit, të krijojë një hapësirë për shkrimtarët palestinezë që të ndajnë mendimet, ndjenjat, reflektimet e tyre mbi letërsinë në këtë kohë të tmerrshme dhe mizore dhe jo t’i heshtë ata”, theksojnë ata në letër.
Edhe shumë shtëpi botuese arabe kanë njoftuar se do të bojkotojnë panairin. Midis tyre është Autoriteti i Librit Sharjah në Emiratet e Bashkuara Arabe, i cili vuri në dukje se ai përkrah “rolin e kulturës dhe librit në inkurajimin e dialogut dhe mirëkuptimit midis popujve”.
Shoqata e Botuesve të Emirateve lëshoi një deklaratë përkatëse, ndërsa gazeta National, me qendër në Emiratet e Bashkuara Arabe, shkruante se edhe Shoqata e Botuesve Arabë të Egjiptit u tërhoq nga Panairi i Librit.
Nga ana e saj, botuesi i Sibley në Mbretërinë e Bashkuar, Zach Testar i Shtëpisë Botuese Fitzcarraldo, tha në një deklaratë: “Një nga qëllimet e letërsisë është të promovojë mirëkuptimin dhe dialogun midis kulturave. Në një kohë të tillë dhune dhe dhimbjeje kaq të tmerrshme, panairi më i madh i librit në botë ka për detyrë të mbështesë zërat nga Palestina dhe Izraeli. Ne qëndrojmë në solidaritet me Antania Sibley dhe botuesin e saj gjerman”. /tesheshi.com/
