Sekretari i Përgjithshëm i Aleancës së Atlantikut të Veriut (NATO) Jens Stoltenberg njoftoi se aleanca do të zhvillojë një stërvitje të madhe bërthamore javën e ardhshme, pasi Rusia paralajmëroi se do të tërhiqej nga marrëveshja globale për ndalimin e testeve bërthamore, raporton AP.
Stoltenberg tha se stërvitjet do të sigurojnë “besueshmërinë, efikasitetin dhe sigurinë e arsenalit tonë bërthamor dhe do të dërgojnë një mesazh të qartë se NATO do të mbrojë të gjithë aleatët e saj”.
Ai shtoi se pushtimi rus i Ukrainës është një kujtesë e rolit të rëndësishëm që armët bërthamore të NATO-s luajnë në parandalimin e agresionit të mundshëm.
Zëvendësministri i Jashtëm rus Sergei Ryabkov tha të martën se Moska do të tërhiqet nga Traktati Gjithëpërfshirës i Ndalimit të Testeve Bërthamore për t’u barazuar me Shtetet e Bashkuara, por do të rifillojë testet bërthamore vetëm nëse Uashingtoni do ta bëjë këtë fillimisht.
Traktati Gjithëpërfshirës i Ndalimit të Testeve Bërthamore, i miratuar në vitin 1996 dhe nuk ka hyrë kurrë plotësisht në fuqi, ndalon të gjitha testet bërthamore kudo në botë. Ai u nënshkrua nga presidenti rus dhe ai amerikan, por SHBA nuk e ratifikuan kurrë.
Ryabkov u tha gazetarëve se Rusia do të tërhiqte ratifikimin e saj sepse SHBA nuk e bëri këtë. Ai paralajmëroi se në rast të një prove bërthamore amerikane “ne do të detyrohemi të bëjmë të njëjtën gjë”. /tesheshi.com/
