Të hënën, policia ukrainase arrestoi një ushtar rus 42-vjeçar, i cili ishte fshehur në ndërtesa të braktisura në Kharkiv për rreth gjysmë viti.
Gjatë vëzhgimit rreth Kharkivit, patrulla e policisë gjeti dhe ndaloi një burrë të cilin ata e përcaktuan se ishte ushtar i Brigadës së 27-të të Gardës së Motorizuar të Rusisë.
Burri, i cili ishte me rroba civile, me sa duket u nda nga njësia e tij ndërsa po ikte nga një kundërofensivë ukrainase shtatorin e kaluar. Ende nuk është e qartë se si ai arriti të fshihej për gjashtë muaj pas tërheqjes ruse.
“Pasi e kontrolluam, rezultoi se ishte një burrë nga zona e Moskës dhe se shërbente në Brigadën e 27-të të Gardës së Motorizuar”, thuhet në njoftimin e policisë. “I arrestuari pretendon se ka qenë i fshehur që kur forcat ukrainase çliruan zonën”.
Policia ukrainase nuk ka dhënë detaje shtesë.
Kundërsulmi i befasishëm ukrainas në rajonin e Kharkivit ndodhi në të njëjtën kohë kur forcat ruse ishin nën sulm nga jugu.
Në vetëm pak ditë, ukrainasit i dëbuan rusët nga më shumë se 6000 kilometra katrorë territor dhe vendosën kontrollin mbi rajonin e Kharkivit.
Menjëherë pas çlirimit, autoritetet ukrainase kryen një kërkim të plotë derë më derë për ushtarët rusë që kishin mbetur pas ose kishin qëndruar qëllimisht prapa për të kryer sabotim. /tesheshi.com/
