David Card, Joshua D. Angrist dhe Guido W. Imbens janë fituesit e Çmimit Nobel në Ekonomi për vitin 2021, njoftoi Akademia Mbretërore Suedeze e Shkencave.
David Card u shpërblye për “kontributin e tij empirik në ekonominë e punës”, ndërsa Angrist dhe Imbens morën njohje për “qasjen e tyre metodologjike në analizën e marrëdhënieve kauzale”, sipas shpjegimit të vendimit.
“Laureatët e këtij viti – David Card, Joshua D. Angrist dhe Guido W. Imbens – na dhanë njohuri të reja në tregun e punës dhe na treguan se çfarë përfundimesh për shkakun dhe efektin mund të nxjerrim nga eksperimentet natyrore. Qasja e tyre është zgjeruar në fusha të tjera dhe ka sjellë një revolucion në kërkimin empirik,” shtohet shpjegimi.
Kujtohet se ndryshe nga Çmimet Nobel të tjera, njohja për ekonominë nuk u parashikua në testamentin e Alfred Nobel, por u krijua nga Banka Qendrore Suedeze në vitin 1968, dhe fituesi i parë u zgjodh një vit më vonë.
Çmimi i vitit të kaluar shkoi për dy ekonomistë nga Universiteti Stanford në Kaliforni, Paul Milgrom dhe Robert Wilson, për kontributet e tyre të jashtëzakonshme në zhvillimin e teorisë së ankandit. /tesheshi.com/
