Cristiano Ronaldo shënoi tre herë sonte në “Vicente Calderon”; tre golat e fitores 0-3 të Realit në sfidën ndaj Atletikos.
Kjo ishte fitorja e parë e Realit në stadiumin e Aletikos në kampionat që nga sezoni 2012-2013, ndërkohë që për Ronaldo-n qe tregolëshi i 39-të në karrierën e tij.
Reali meritoi të kryesonte në pjesën e parë, pas një paraqitjeje mjaft të mirë. Ronaldo shënoi fillimisht në minutën e 23-të, në një goditje dënimi. Topi i goditur prej tij ndryshoi drejtim e përfundoi në rrjetë.
Atletiko i bëri një nisje të furishme pjesës së dytë, por gjithçka u duk se mori fund kur Ronaldo shënoi nga pika e 11-metërshit në minutën e 71-të. I njëjti lojtar do ta thellonte rezultatin pak më vonë.
Carrasco u përpoq fort për vendasit të shënonte më së paku golin e nderit; një përpjekje që nuk pati sukses.
Reali i Madridit mbetet skuadra e vetme në kampionatin spanjoll që ende nuk e njeh humbjen në këtë sezon. Në krye të klasifikimit, me katër pikë më shumë se Barcelona, Reali mbetet ekipi për t’u mundur. /tesheshi.com/
