Presidenti amerikan Donald Trump i kërkoi të martën Hamasit të binte dakord me atë që ai e quajti një “propozim përfundimtar” për një armëpushim 60-ditor në Gaza, i cili do t’u dorëzohet ndërmjetësve nga Katari dhe Egjipti.
Në një postim në rrjetet sociale, Trump tha se përfaqësuesit e tij patën një takim “të gjatë dhe produktiv” me zyrtarët izraelitë mbi Gazën. Ai nuk i emëroi përfaqësuesit e tij, por i dërguari special i SHBA-së Steve Witkoff, Sekretari i Shtetit Marco Rubio dhe Zëvendëspresidenti J.D. Vance ishin planifikuar të takoheshin me Ron Dermer, një këshilltar i lartë i kryeministrit izraelit Benjamin Netanyahu.
Trump tha se Izraeli kishte rënë dakord për një armëpushim 60-ditor, “gjatë të cilit ne do të punojmë me të gjitha palët për t’i dhënë fund luftës”.
Ai tha se përfaqësuesit nga Katari dhe Egjipti do t’ia dorëzonin “këtë propozim përfundimtar” Hamasit.
“Shpresoj, për hir të Lindjes së Mesme, që Hamasi ta pranojë këtë marrëveshje, sepse nuk do të bëhet më mirë – do të bëhet MË KEQ. Faleminderit për vëmendjen tuaj për këtë çështje!” tha ai.
Më herët gjatë ditës, Trump u tha gazetarëve se shpresonte që një marrëveshje armëpushimi të mund të arrihej midis Izraelit dhe Hamasit në Gaza javën e ardhshme. Ai është planifikuar të takohet me Netanyahu-n në Shtëpinë e Bardhë të hënën, raportoi Reuters.
Hamasi më parë ka thënë se është gati të lirojë pengjet e mbetura në Gaza si pjesë e çdo marrëveshjeje për t’i dhënë fund luftës, ndërsa Izraeli thotë se lufta mund të përfundojë vetëm nëse Hamasi çarmatoset dhe shpërbëhet. Grupi palestinez refuzon të lëshojë armët.
Lufta në Gaza filloi kur grupet e udhëhequra nga Hamasi sulmuan Izraelin më 7 tetor 2023, një përgjigje ndaj shtypjes së gjatë të palestinezëve nga Izraeli.
Të dyja palët kanë treguar pak gatishmëri për t’u tërhequr nga kërkesat e tyre që atëherë.
Momentum pas armëpushimit me Iranin
Shtetet e Bashkuara kanë propozuar një armëpushim 60-ditor dhe lirimin e gjysmës së pengjeve në këmbim të të burgosurve palestinezë dhe mbetjeve të palestinezëve të tjerë të mbajtur nga Izraeli.
Ministri i Jashtëm Izraelit Gideon Saar tha më parë këtë javë se Izraeli kishte rënë dakord për një armëpushim 60-ditor dhe marrëveshje pengjesh të propozuar nga SHBA-të, dhe ia kishte lënë përgjegjësinë Hamasit.
Trump dhe ndihmësit e tij duket se po përpiqen të përdorin momentumin e krijuar nga armëpushimi midis Izraelit dhe Iranit që hyri në fuqi javën e kaluar për të siguruar një armëpushim të qëndrueshëm në Gaza. Trump u tha gazetarëve gjatë një vizite në Florida se do të ishte “shumë i ashpër” me Netanyahun për një armëpushim në Gaza. “Shpresojmë që të ndodhë. Dhe mezi presim që të ndodhë diku javën tjetër,” u tha ai gazetarëve. “Duam t’i nxjerrim pengjet.” /tesheshi.com/
