Për herë të tetë ka ndodhur që Rusia të përdorë veton për ta mbrojtur regjimin e Assad-it në Këshillin e Sigurimit të OKB-së. Një veto e saj ka bllokuar projektrezolutën e paraqitur nga SHBA-ja, Britania dhe Franca, e që dënonte sulmin kimik të javës së shkuar në Siri.
Kina, Etiopia dhe Kazakistani abstenuan në votimin e orëve më parë për miratimin e projektrezolutës që do t’i kërkonte regjimit të Damaskut të bashkëpunonte me hetuesit ndërkombëtarë, kurse Bolivia iu bashkua Rusisë në votimin kundër saj.
Projektrezoluta mbështeste një hetim në terren, si dhe kërkonte që qeveria siriane të jepte informacionin e nevojshëm ushtarak për ditën e sulmit kimik e të mundësonte hyrjen në bazat ajrore.
Një prej zërave që shprehu pakënaqësinë për veton e Rusisë ishte ambasadorja e SHBA-së në OKB, Nikki Haley, e cila do të deklaronte: “Ju po e izoloni veten nga bashkësia ndërkombëtare sa herë që një nga avionët e Assad-it hedh një tjetër bombë fuçi mbi civilët, sa herë që Assad-i përpiqet ta vdesë urie një tjetër bashkësi.”
Në reagimin e tij, sekretari i Jashtëm britanik, Boris Johnson, tha se Rusia gjendej në anën e gabuar të debatit; për presidentin francez Francois Holande, rusët mbanin përgjegjësi të madhe për bllokimin e një reagimi ndërkombëtar ndaj sulmit kimik të Assad-it. /tesheshi.com/
