Mbizotërimi i spanjollëve në garat e shpejtësisë në Moto GP ka vijuar dhe këtë sezon, veçse këtë herë me një tjetër emër.
Pas Jorge Lorenzo-s dhe Marc Marquez-it është shfaqur një tjetër pilot, Maverick Vinales. Në të parin sezon të tij te Movistar Yamaha, ai i ka fituar të dy garat me të cilat ka nisur kampionati në vazhdim.
Fitorja në Katar është shoqëruar me atë në Argjentinë, dhe kështu Vinales është bërë i pari pilot i Yamaha-s që i fiton dy garat e para sezonale që prej vitit 1990, kur këtë gjë e bënte amerikani Wayne Rainey.
Vinales do ta niste garën në Argjentinë nga vendi i gjashtë, për t’u shfaqur mes pilotëve kryesues që në fundin e xhiros së parë. Kryesimin e garës do ta merrte pas rrëzimit të Marc Marquez-it, për të mos e lëshuar më.
Si dhe në garën e shkuar, i dyti do ta kalonte finishin veterani Valentino Rossi, po me Yamaha. Britaniku Cal Crutchlow, surprizues sezonin e shkuar, do të dilte i treti, ndërkohë që nuk do ta përfundonin garën as Pedrosa, as Dovizioso e as Lorenzo.
Spanjolli Vinales e kryeson kampionatin me pikë të plota, 50 të tilla, ndjekur nga Rossi e Dovizioso.
Gara e ardhshme e Moto GP-së është pas dy javësh, më 23 prill, në SHBA. /tesheshi.com/
