Avi Gabbay bëhet i dyti ministër që dorëhiqet nga qeveria e Netanyahu-t pasi ky i fundit zgjodhi të vërë në krye të Ministrisë së Mbrojtjes politikanin ultranacionalist Avigdor Lieberman.
Dorëheqja e ministrit të Mjedisit këtë të premte pason atë të ish-ministrit të Mbrojtjes, Moshe Ya’alon, i cili po ashtu u dorëhoq pikërisht për të njëjtën arsye.
Gabbay thotë mes të tjerash në deklaratën e dorëheqjes: “Manovrimi i fundit politik dhe zëvendësimi i ministrit të Mbrojtjes janë, në vështrimin tim, veprime të rënda që shpërfillin atë çka është e rëndësishme për sigurinë e vendit, dhe do të sjellin më shumë ekstremizëm dhe ndasi midis njerëzve.”
“Nuk mund ta pranoj,” thotë Avi Gabbay, “largimin e Ya’alon-it, një ministër profesionist mbrojtjeje.”
Në këndvështrimin e ministrit të dorëhequr të Mjedisit, vendi duhet të ketë një qeveri të së djathtës, por nuk është e drejtë të formohet një qeveri ekstremiste.
Gabbay është një prej themeluesve të Kulanu-së, partisë së vetme të qendrës në koalicionin qeverisës të Netanyahu-t, me dhjetë deputetë në parlament. Por vetë Gabbay nuk është anëtar i parlamentit, kështu që në shifra nuk e dëmton koalicionin.
Kryeministri izraelit e emëroi të mërkurën Avigdor Lieberman-in si ministër të Mbrojtjes me synimin për të forcuar koalicionin që qeveris vendin. I njohur si një ultranacionalist, emërimi i Lieberman-it nuk është pritur mirë as në Izrael, as ndërkombëtarisht. /tesheshi.com/
