Cristiano Ronaldo vijon të shpërblehet për tërë paraqitjet e tij gjatë vitit të shkuar. Në vendin e tij ai është nderuar me çmimin e lojtarit më të mirë të vitit.
Sulmuesi i Realit të Madridit fitoi shumë trofe me klubin e tij sezonin e shkuar, mes të cilëve atë të Champions League-s, por kulmi do të qe shpallja e Portugalisë kampione e Europës në Francë.
Merita e Ronaldo-s qe e padiskutueshme në të parin trofe të fituar nga ekipi i tij përfaqësues, me ç’rast është shpërblyer dhe me çmimin e lojtarit më të mirë të vitit në Portugali.
“Dua të falënderoj kolegët e mi të Realit të Madridit, ekipit kombëtar, trajnerin, personelin, dhe mbi të gjitha tifozët portugezë,” u shpreh ai në ceremoninë e marrjes së çmimit.
Çmimi “Trajneri i vitit” iu dha kuptueshëm Fernando Santos-it, trajnerit të përfaqësueses portugeze. /tesheshi.com/
