Në përfundim të ndeshjes Izrael-Spanjë, të luajtur të hënën në Jeruzalem, 6 tifozë vendas kanë hyrë në fushë dhe njëri prej tyre është sulur me një thikë në dorë drejt mesfushorit Isko.
Lajmi është publikuar të martën nga gazeta “The Times of Israel”, e cila ka shkruar se njëri prej gjashtë invadorëve të fushës, ka vrapuar në drejtim të lojtarit spanjoll me thikë në dorë, por ajo i ka rrëshqitur në vrap e sipër dhe forcat e sigurisë kanë arritur ta ndalojnë e arrestojnë, siç bënë edhe me 5 tifozët e tjerë.
Po të martën, zëdhënësi i policisë lokale deklaroi për mediat se nuk bëhet fjalë për ndonjë atentat të mundshëm, por për një moment sporadik, duke theksuar se Isko për asnjë cast nuk ka qenë i kërcënuar, pasi tifozi, sipas policisë, ka thënë se vetëm donta ta trembte.
Normal që policia vendase tenton të ruajë sa të mundet imazhin e organizimit të ndeshjes, por nga ana tjetër, mbetet mister se çfarë donte arma në stadium, e më pas, çfarë qëllimi kishte tifozi, që vrapoi me thikë në dorë drejt Iskos. /tesheshi.com/
