Kancelari gjerman Olaf Scholz pati një bisedë telefonike me presidentin rus Vladimir Putin për herë të parë në dy vjet, njoftoi të premten zyra e kancelarit gjerman.
“Kancelari gjerman dënoi agresionin rus kundër Ukrainës dhe i kërkoi presidentit Putin të ndalojë sulmin dhe të tërheqë njësitë”, thuhet në deklaratën lidhur me bisedën telefonike mes Scholz dhe Putin.
Më tej thuhet se gjatë bisedës Scholz këmbënguli që Rusia të tregojë gatishmëri për negociata me Ukrainën “me synimin e një paqeje të drejtë dhe të qëndrueshme”.
Në të njëjtën kohë, Scholz theksoi gatishmërinë e Gjermanisë për të ndihmuar Ukrainën të mbrohet kundër agresionit rus “për aq kohë sa duhet”.
Scholz kishte folur më parë me Zelensky-n
Në fund të njoftimit thuhet se kancelari gjerman ka folur me presidentin ukrainas Volodymyr Zelensky para komunikimit me Putinin dhe se të njëjtën gjë do ta bëjë edhe pas takimit me presidentin rus.
Scholz gjithashtu informoi partnerët e BE-së dhe NATO-s për bisedën.
Nga qarqet qeveritare bëhet e ditur se Scholz dënoi ashpër dërgimin e njësive të Koresë së Veriut në luftë kundër Ukrainës, duke deklaruar se ishte një “përshkallëzim i fortë i konfliktit”.
Scholz dhe Putin, siç rezulton, do të vazhdojnë të qëndrojnë në kontakt.
Siç raportojnë mediat duke cituar burime në Kiev, presidenti ukrainas Zelensky paralajmëroi kancelarin gjerman, përpara fjalosjes së tij me Putinin, se ky takim mund ta ndihmojë Putinin të dalë nga izolimi ndërkombëtar dhe të vazhdojë operacionet ushtarake kundër Ukrainës.
Një bisedë “e sinqertë”
“Putini nuk dëshiron paqe, ai vetëm dëshiron një pushim”, tha Zelensky, siç raportohet nga agjencitë.
Nga ana e tij, Kremlini ka njoftuar deri më tani se presidenti rus Vladimir Putin dhe kancelari gjerman Olaf Scholz patën një bisedë “të sinqertë” të premten, “me iniciativën” e Berlinit, për konfliktin në Ukrainë.
“U zhvillua një shkëmbim i detajuar dhe i sinqertë i pikëpamjeve për situatën në Ukrainë,” tha Kremlini në lidhje me bisedën midis dy liderëve, sipas agjencive. /tesheshi.com/
