Deputeti socialist Pandeli Majko, shkon e takohet me kolegen e tij socialiste Elisa Spiropali, kryeparlamentare, dhe më pas shkruan:
Sot, në takim me kryetaren e Kuvendit të Shqipërisë, Elisa Spiropali.
I kërkova që brenda protokolleve në fuqi, ti kërkohej Shërbimit Informativ Kombëtar informacion me shkrim, lidhur me aludimet për fshehje informacioni të deklaruar dje në publik nga Sali Berisha!
Kam vendosur që të dorëzoj çdo imunitet parlamentar i cili mund të jenë i nevojshëm për hetimin e çështjes së ngritur për emrin tim në deklarimet publike të Sali Berishës”.
Pra një ditë pas një morrie akuzash të Berishës, një lloj frymëmarrje e tij në këtë botë, në të cilat ishte dhe Majko, cilësuar nga një ish-doktor zemre më pazemër në politikë si “kriminel elektoral”, socialisti i njohur kërkon zbardhjen e të vërtetës mbi të(!). Por ngjan një teatralitet i tepruar, madje dhe i panevojshëm, meqë ky reagim është shoqëruar dhe me një foto mes dy emrave të pushtetit. Më logjike do kish qenë hedhja në gjyq, nëse Majko po e vuan kaq shumë përfoljen e emrit të tij nga Berisha. Ndërsa politikisht, jemi në vitin 2025 dhe janë goxha vite, që nga shfaqja në publik e Berishës dhe e Majkos, aq sa opinioni të jetë sqaruar tashmë se kush është njëri e kush tjetri. Nëse elektorati do ishte ndikuar nga akuzat pacak të Berishës, i vetmi identitet politik që ai ka, deri në stad psikopatie, ahere do kishte qenë gjithnjë në avantazhe elektorale. E kundërta, qyshse ia nisi politikës së akuzave, ka vetëm disavantazhe elektorale.
Dhe nëse nuk ndodh ndonjë mrekulli në qënien e tij, ai dhe frymën e fundit, atë që është ligj hyjnor për çdo njeri, do e ketë një akuzë për kundërshtarin. Kështu që nuk është punë SHISH-i; çështja e të vërtetave dhe gënjeshtrave të Berishës, politikisht është rregulluar me kohë, nga vetë votuesi. /tesheshi.com/
