Nga Blendi Gashi
Enver Hoxhaj, një ndër figurat e PDK-së, dikur mund të ketë qenë personi më i urryer nga kjo forcë në radhët e Vetëvendosjes; por gjërat duket se kanë ndryshuar.
Mëngjesin e së mërkurës së kaluar, ishte Hoxhaj ai që loboi tek krahu anti-Kurti, konkretisht tek Dardan Molliqaj, Visar Ymeri e Aida Dërguti, për t’i dhënë votat për Demarkacionin.
Ndërsa në mbrëmje u takua me vetë Albinin duke qëndruar për një kohë bukur të gjatë së bashku. Ndodhi kjo në një organizim të Ambasadës së Bullgarisë, ku pranë tyre u pa edhe ambasadori i Shqipërisë në Kosovë, Qemal Minxhozi.
Hoxhaj dhe Kurti mund të kenë diskutuar për Demarkacionin, marrëveshje që dështoi për herë të tretë të ratifikohet të mërkurën dhe do tentohet sërish javën tjetër, por vështirë se për këtë kanë pasur një pajtim kur dihet se kryevetëvendosësi e kundërshton fuqishëm projektligjin për Demarkacionin pasi vlerëson se Kosova humb tokë.
Por ky takim mes tyre sigurisht që shënon një kthesë në politikbërjen kosovare, sidomos në raportet mes PDK-së e Vetëvendosjes, parti këto që për vite mbesin armiqtë më të mëdhenj mes vete, ku kanë shkëmbyer akuza të mëdha për krim e korrupsion.
Por me riardhjen e Kurtit në krye të Vetëvendosjes, siç duket gjërat do ndryshojnë ngadalë dhe Albini do nis komunikimin normal edhe me PDK-në.
A do të dalin fjalët e Molliqajt?
Ndërsa mbesin enigma temat që mund të kenë biseduar Kurti e Hoxhaj, padyshim që takimi mes tyre mund të shtrojë pyetjen: a po hapet përfundimisht Kurti për një koalicion qeverisës me PDK-në?
Kjo mund të duket shumë e arritshme nëse kihen parasysh fjalën e ish-sekretarait të Vetëvendosjes, Daradan Molliqaj i cili pasi prishi raportet me Kurtin, publikisht tek gazetari Baton Haxhiu tha se Albini t’i ketë thënë se duhet diskutuar edhe mundësinë e kolacionin me PDK-në, pasi sipas tij ndërkombëtarët po duanë që PDK të jetë në pushtet.
“Albin Kurti e ka lënë si të hapur mundësinë që të ketë koalicion më PDK-në. Për mu kjo është vijë e kuqe”, deklaroi muaj më parë Molliqaj.
Mbetet të shihet në të ardhmen nëse do dalin fjalët e Molliqajt dhe Kurti do lë pas armiqësinë me PDK-në për të ardhë në pushtet, apo takimi me Hoxhajn ka qenë i rastësishëm dhe vetëm një përshëndetje e zakonshme. /tesheshi.com/
