Austria kurrë nuk do t’i japë Ukrainës statusin e kandidatit për në BE në kurriz të Ballkanit Perëndimor, tha kryetari i parlamentit austriak Wolfgang Sobotka.
“Austria nuk do ta mbështesë kurrë këtë,” theksoi Sobotka në një intervistë me agjencinë APA.
Ai theksoi se për Austrinë është e rëndësishme që të gjitha vendet e Ballkanit Perëndimor jo vetëm të kenë perspektivë evropiane, por edhe t’u tregohet mënyra se si mund të hyjnë në BE.
Ai kujtoi se kancelari austriak Karl Nehammer e kishte bërë të qartë se nuk do të kishte një proces të shpejtë pranimi për Ukrainën.
Lidhur me propozimin austriak për procesin e anëtarësimit, Sobotka tha se është i mirë për vendet e Ballkanit Perëndimor.
Sipas tij, anëtarësimi i plotë në BE, sipas modelit të propozuar austriak, nuk do të hiqej nga tavolina, por përkundrazi, thotë ai.
“Procesi drejtohet nga vendet që duan të anëtarësohen. Nëse i plotësojnë të gjitha kushtet, atëherë do të jenë anëtarë”.
Në të njëjtën kohë, ai kritikoi procesin aktual të anëtarësimit me 35 kapituj, në të cilët, thekson ai, “negociatat kanë vazhduar pafundësisht pa i treguar qytetarëve perspektivë”.
Përveç kësaj, thotë ai, non-paper-i austriak nxjerr mësime nga proceset e mëparshme të pranimit.
Sipas propozimit austriak, tha Sobotka, duhet të jetë e mundur që edhe para se të plotësohen parakushtet, për shembull në fushën e sundimit të ligjit, të bëhet një integrim ekonomik zyrtar dhe ligjor.
Ai pretendon se “non-paper” austriak është një inkurajim për anëtarët e BE-së që të mos bllokojnë kandidatët në rrugën e tyre drejt Bashkimit.
Ai vlerësoi se vetoja e Bullgarisë kundër Maqedonisë së Veriut është e padurueshme dhe se dëmton reputacionin e BE-së në rajon.
Non-paper-i i Austrisë është i mirë për të parandaluar bllokada të tilla.
Sa i përket krahasimit të Kosovës me Donbasin prorus, Sobotka tha se narrativa e Vladimir Putinit duhet të hidhet poshtë.
“Kosova tashmë kishte autonomi gjatë Jugosllavisë, përpara se Serbia të vidhte pavarësinë e saj në 1989,” tha ai.
Nga ana tjetër, në vitin 1994, Rusia dha garanci për integritetin territorial të Ukrainës.
Ai tha se gjatë viteve të fundit, Kosova ka mbajtur gjithmonë një qëndrim të qartë pro-evropian për çështje të vështira, siç po bën tani duke mbështetur sanksionet perëndimore kundër Rusisë.
