Eshtë bërë edhe më e qartë skema e “përzënies” së Thaçit nga Dialogu, një i preferuar i amerikanëve, pas së cilës thuhet se qëndrojnë gjermanët.
Dhe së fundi, ka qenë pikërisht një zë nga Gjermania, i cili ka arsyetuar se përse presidenti i Kosovës, përfshirë dhe faktin që i rëndon një aktakuzë, nuk ka pse të jetë ai njeriu që duhet të udhëheqë dialogun.
Eshtë Bodo Weber, bashkëpunëtor i lartë i Këshillit për politikë të demokratizimit nga Berlini, i cili në një prononcim për REL, tha se është krejtësisht e logjikshme që bisedimet nën përkujdesjen e Bashkimit Evropian, të udhëhiqen nga presidenti i Serbisë, Vuçiq dhe nga kryeministri i Kosovës, Avdullah Hoti.
“Këtu kemi të bëjmë me kombinim të faktorëve dhe një prej tyre është shpallja e aktpadisë kundër presidentit (të Kosovës, Hashim) Thaçi”, ka thënë Weber.
“Duhet të përkujtojmë se që nga viti i kaluar kemi vendimin e Gjykatës Kushtetuese të Kosovës, të cilën BE-ja që nga fillimi e ka marrë seriozisht, dhe kjo ka të bëjë me atë që dialogun, nga ana e Kosovës duhet ta udhëheqë kryeministri. Duhet përkujtuar edhe që në samitin e Berlinit, në muajin prill të vitit të kaluar, fjalën kryesore e ka pasur kryeministri i atëhershëm, (Ramush) Haradinaj dhe jo zotëri Thaçi”, theksoi Weber.
Ndërsa duke komentuar edhe takimin e dështuar në Shtëpinë e Bardhë, i cili do mbahej me nismën e të dërguarit amerikan Richard Grenell, Weber thotë që mbetet të shihet nëse nga ai proces ka mbetur diç.
“Zotëri Grenell ka llogaritur në dy presidentët dhe nga vet ky fakt, pozicioni i tij është dobësuar pas publikimit të aktakuzës ndaj presidentit Thaçi”, theksoi Weber.
Sa i përket inisiativës europiane për Dialogun, asaj të dyshes Merkel – Macron, ai tha kjo kërkon pozicion të qartë politik nga ana e dyshes në fjalë, se cili është qëllimi i dialogut dhe cila është korniza brenda së cilës bisedohet. /tesheshi.com/
