Një goditje i ka ardhur Policisë shqiptare nga Kosova, pas vartësit e ministrit Balla kanë arrestuar gabimisht disa artistë kosovarë, duke i marrë për njerëz të lidhur me një grup trafiku tritoli nga Gjilani.
Raportohet se ata ishin kthyer nga Italia si pjesë e projektit “The Handke Project” me shfaqje në Firence dhe po udhëtonin drejt Kukësit, për të vijuar më pas drejt Kosovës, kur janë ndaluar nga Policia lokale e mbajtur disa orë në Komisariat.
Por trajtimi, sipas disa dëshmive nga vetë ata, ka qenë skandaloz, pa llogaritur që iu është marrë liria gabimisht, qoftë dhe për disa orë.
Në njoftimin e qendrës “Multimedia” në Kosovë për këtë rast, thuhet se ata janë lënë të lirë në mëngjesin e së hënës, pasi u sqarua se ishin arrestuar e mbajtur gabimisht, por se orët aty kanë qenë një terror.
“Pamja e përgjithshme e Policisë së Shqipërisë është ajo e një ngrehine dhune të normatizuar. Gjatë këtyre rreth dhjetë orëve kemi qenë pre e një terrori sistematik, kemi qenë të sulmuar fizikisht e psikikisht nga vagabondë të veshur në uniforma policore. Për një kohë kaq të shkurtër disaorëshe kemi parë e ndeshur një botë njerëzish që objektiv të parë kanë poshtërimin e uljen e dinjitetit të tjetrit; Që gjuhën seksiste, dhunën psikike, shakatë pa kripë e kërcënimet i kanë kryefjalë të punës e sjelljeve të tyre. Ne thjesht ndihemi të turpëruar për sjelljet dhe veprat e tyre”, shkruhet në njoftimin e lëshuar pas lirimit nga Policia, njëherësh duke thënë se jo të gjithë policët janë sjell keq e se kishte prej tyre me sjellje korrekte.
Një reagim ka ardhur dhe nga dramaturgu i njohur kosovar Jeton Neziraj, autor i shfaqjes e udhëheqës i qendrës “Multimedia”, duke e quajtur mbajtjen e tyre në Komisariatin e Kukësit si “të tmerrshme”
“Është pamja më e mjerë e një Shqipërie që po rrëshqet ngadalë në një shtet ku dhuna e brutaliteti bëhen ligj e mjet komunikimi. Fytyrat e policëve dhunues i mbajmë mend, dhe ata kanë emra, kërkojmë që ata të japin llogari para ligjit. Në anën tjetër, duam po ashtu t’i falënderojmë plot nga ata policë e zyrtarë, që edhe në ato çaste dramatike, na mbështesnin e na trajtonin me dinjitet. Edhe këta kanë emra e edhe këtyre do t’ua mbajmë mend fytyrat”, ka thënë ai. /tesheshi.com/
