Kryeministri shpalli projektin e një shteti të ri, në trajtë godinash të reja qeveritare.
Më saktë, është fjala për një kompleks qeveritar për akomodimin e institucioneve të shtetit, pasi siç tha i pari i qeverisjes, këto institucione momentalisht punojnë në kushte jo të mira, në godina të trashëguara nga komunizmi, të cilat kanë edhe kosto mirëmbajtje.
Kreu i qeverisë e bëri këtë deklaratë gjatë një konkursi ndërkombëtar ku dhjetë studio prestigjioze paraqitën projektet e tyre për krijimin e zyrave dhe shërbimeve bashkëkohore për administratën publike.
“Aktualisht sot, institucionet publike paguajnë miliona euro në vit qira për të ushtruar aktivitetin e tyre, në mjedise që janë larg së qenurit të denja për ambicien tonë të Shqipërisë 2023, për atë çka meritojnë qytetarët që shërbehen nga këto institucione, larg qenurit të denja për kushtet në të cilat në fakt duhet të punojnë shërbëtorët e shtetit”, tha Rama.
Ai bëri me dije praktikën që do ndiqet në këtë inisiativë të re për një shtet me tjetër fytyrë.
“Shteti s’do dorëzojë më prona siç e i ka dorëzuar në të shkuarën te privatët, por do futet në një rol aktiv për të nxjerrë nga shfrytëzimi i pronave publike të mira publike edhe për të nxjerrë përfitime financiare që do shërbejnë për investime të mëtejshme.
Shteti vendos në dispozicion pronat publike dhe më pas fton në konkurs investitorë vendas e të huaj për ndërtimin e projekteve, nga ku shteti do të përfitojë si pronar i truallit një infrastrukturë të re për institucione publike që ende rrinë në mjedise me qira apo ende nuk e kanë selinë e tyre të shekullit të ri, si për shembull Biblioteka Kombëtare”, arsyetoi kryeministri. /tesheshi.com/
