Një 41-vjeçare, nënë e katër fëmijëve, i ka dhënë fund jetës me vetëhelmim, një rast që po nxit median të zbulojë se çfarë fshihet pas këtij akti që ka ardhur nga një bullizim në rrjete, më saktë në TikTok, pas një profili fals që ishte hapur në emër të saj, prej gati një viti, ku denigrohej rëndë në moral. Ka qenë pikërisht kjo arsyeja që viktima, me banim në Vërdardhë të Sukthit, nga stresi i madh i shkaktuar prej presionit shoqëror, ka shkuar drejt vetëflijimit.
Bedre Loka punonte në një fabrikë në zonë, ndërsa bashkëshorti vente e vinte nga Greqia, ku dhe punonte si emigrant. Koleget në fabrikën e litarëve të anijeve ku viktima punonte, janë shprehur se ajo kishte pasur një konflikt me një punonjëse tjetër dhe fill pas tij në rrjetet sociale u hap një llogari e rreme që shpërndante përmbajtje denigruese ndaj saj.
Tashmë po hetohet se kush qëndron pas sulmit ndaj saj, duke e cenuar në nder e moral, me pasojë marrjen e jetës.
Për këtë rast tragjik, Policia e Durrësit doli me këtë deklaratë:
“Në lidhje me një lajm të publikuar në media, për një shtetase që ka humbur jetën pasi dyshohet se ka konsumuar fotoksinë, për shkak të bullizmit, ju sqarojmë se:
Më datë 02.01.2024, në orën 16:30, jemi njoftuar nga shërbimet e spitalit se shtetasja B. L., 41 vjeçe, që dyshohej se kishte konsumuar lëndë helmuese fotoksinë, edhe pse kishte marrë ndihmë mjekësore, nuk kishte mundur të jetonte.
Drejtoria Vendore e Policisë Durrës ka kryer të gjitha veprimet me grup hetimor, në drejtimin e Prokurorisë, dhe materialet janë referuar në Prokurori.
Sqarojmë se në dhjetor të vitit 2022, shtetasja B. L. ka bërë kallëzim se në rrjetet sociale ishte hapur një adresë false me emrin e saj.
Për kallzimin e bërë ne dhjetor 2022, Policia ka kryer të gjitha veprimet dhe i ka referuar materialet në Prokurori dhe çështja është në hetim në Prokurori. Pas këtij kallëzimi nuk ka patur asnjë kallëzim apo shqetësim nga shtetasja B. L, për këtë rast.
Në drejtimin e Prokurorisë së Durrësit vijojnë hetimet për zbardhjen e plotë të rrethanave të këtij rasti. Ndërkohë që vijojnë hetimet intensive për identifikimin dhe vënien përpara përgjegjësisë ligjore të shtetasve që kanë keqpërdorur të dhënat e shtetases B. L”. /tesheshi.com/
