Një Shqipëri me dy “qeveri”: si punojnë ministrat teknikë në “ilegalitet”

Marrëveshja e 18 majit mes Edi Ramës dhe Lulzim Bashës solli një qeveri të re ku 6 ministra dhe zv/kryeministri u propozuan nga opozita. Por që pas emërimit të tyre nuk është zhvilluar asnjë mbledhje qeverië dhe kryeministri Rama nuk i ka takuar asnjëherë vartësit e tij teknikë, të ardhur nga selia blu….   

Më 22 maj është zhvilluar mbledhja e fundit e Këshillit të Ministrave ku shumica e vendimeve tëe marra kanë qenë lëvizjet e reja në përbërjen e qeverisë, me ndryshimin e disa zv/ministrave dhe emërimin e prefektëve të rinj. Kjo ka qenë dhe takimi i fundit i Kryeministrit Rama me kabinetin e tij të vjetër, ndërkohë që në Presidencë po betoheshin ministrat e rinj teknikë të propozuar nga opozita pas një marrëveshje “bashkëqeverisjeje” deri më 25 qershor, kur mbahen zgjedhjet parlamentare.

Në një përpjekje për t’i gërricur nervat kryeministrit, emrat e përzgjedhur nga PD-ja nuk ishin dhe aq teknikë; përkundrazi ishin militantë të thekur partie që e kishin sulmuar, deri dhe sharë Ramën publikisht.  Më i debatuari ishte emri i ministrit të Rendit, Dritan Demiraj i cili ishte shkarkuar nga radhët e ushtrisë prej ministres Mimi Kodheli për shkelje rregulloreje. Por ai nuk e pati asnjëherë shansin të ulej si i barabartë përballë ish-shefes së tij në tryezën e rrumbullakët të kabinetit qeveritar.

Rama tashmë i ka kthyer shpinën zyrës së kryeministrit dhe me tuta e atlete (me benevrekë sipas cinikëve politikë e mediatike) ka nisur fushatën qytet më qytet të vendit.

Burime nga kryeministria bëjnë të ditur se ai nuk i ka takuar asnjëherë vartësit e tij të rinj, ministrat e sjellë nga PD-ja. I vetmi kontakt mes tij dhe teknikëve demokratë është njeriu i besuar i Ramës, sekretari i Përgjithshëm i Kryeministrisë, Ëngjëll Agaçi.

Emërimi i ministrave të rinj nuk është reflektuar as në faqen zyrtare të kryeministrisë ku vijojnë të qëndrojnë fotot e të ikurve: Niko Peleshi, Lindita Nikolla, etj..

E vetmja gjurmë në këtë faqe që tregon se në godinën e kryeministrisë është një grua zv/kryeministre dhe jo Peleshi është njoftimi i fundit për shtyp që flet për takimin e znj. Ledina Mandija me Prokurorin e Përgjithshëm z. Adriatik Llalla në lidhje me hetimin e parave të pista në fushatën elektorale.

Përplasja e administratës me “teknikët”

Ardhja e ministrave demokratë në krye të disa dikastereve të rëndësishme që kanë në varësi një administratë të madhe e të shtrirë në gjithë republikën,  si ministra e Brendshme, ajo e Arsimit, e Financave, Shëndetësisë, Drejtësisë dhe në ministrinë e Mirëqenies Sociale dhe Rinisë, ka sjellë konflikt mes titullarëve dhe vartësve.

Prej ditës së parë në punë, ministrat e Bashës kanë tentuar të minimizojnë apo të pezullojnë krejtësisht përfshirjen e administratës në fushatë elektorale. Duke pasur parasysh se pjesa më e madhe e kësaj administrate mund të jetë e majtë, ata kanë urdhëruar anulimin e lejeve vjetore për periudhën e zgjedhjeve për të shmangur largimin e tyre nga puna në funksion të angazhimit në fushatën e PS-së. Gjithashtu ka nisur gjuetia për të bërë “kurbanët” e parë të kësaj nisme duke shkarkuar çdo punonjës administrate që raportohet se po angazhohet në fushatë. Një punonjës tatimor dhe një mësuese ishin shembujt e parë.  Por urdhërat e tyre kanë hasur rezistencë nga administrata dhe nga vetë kryeministrit Rama. Ai deklaroi se askush nuk mund të ndalojë punonjësit e shtetit që të shkojnë nëpër mitingje partiake në fushatë, për aq kohë sa ata e bëjnë këtë jashtë orarit të punës dhe jashtë institucionit ku punojnë.

Bashkëqeverisja PS-PD ka sjellë në fakt krijimin e 2 qeverive: ajo e ministrave teknikë që  marrin direktivat nga Basha dhe i japin llogari Ëngjëll Agaçit, si dhe qeveria socialiste e Ramës që për ironi ka brenda dhe pak LSI. /tesheshi.com/