Skuadra angleze luan për herë të parë në një gjysmëfinale të Champions League-s, çka i jep asaj një motivim shtesë kundrejt kundërshtarit. Ky do të jetë dhe sezoni i fundit i Manuel Pellegrini-t në krye të Mançester Sitit, dhe kiliani do të kërkojë të bëjë të pamundurën për ta mbyllur sa më mirë këtë kapitull të karrierës së tij.
“Eshtë një short i vështirë,” deklaron trajneri kilian, “por nuk ka rëndësi me cilin ekip luajmë. Alternativat janë të njëjta.”
Ndërsa drejtori sportiv i Mançester Sitit, Txiki Begiristain, pohon se Reali mund të jetë i pandalshëm në fushën e vet.
“[Reali] mund të jetë i pandalshëm në ‘Bernabeu’. Madridi është në gjendje të shkaktojë çdo lloj problemi. Vështirësia është atje, është në historinë e tyre.”
Por ai e sheh me shpresë duelin e ardhshëm. “Ata janë të aftë t’i kthejnë gjërat, por ne mund t’i eliminojmë nëse jemi të fortë dhe të gjallë në sulm.”
Vështirësinë e gjysmëfinales e pranon dhe Zinedine Zidane, trajneri i Realit.
“Eshtë një gjysmëfinale, dhe do të jetë shumë e vështirë.”
“Ne duhet të vazhdojmë të bëjmë atë çka po bëjmë, të përmirësohemi, duke bërë maksimumin për t’i fituar ndeshjet.”
Reali i Madridit u kualifikua për në gjysmëfinale të Champions League-s pasi fitoi 3-0 në “Santiago Bernabeu” ndaj Volfsburgut. Fitorja e thellë qe një përmbysje e takimit të parë të luajtur në Gjermani, ku madrilenët patën humbur 2-0.
Carlo Ancelotti, ish-trajneri i Realit, mendon se madrilenët duhet t’u japin fund gabimeve nëse dëshirojnë ta fitojnë trofeun europian këtë sezon. Sipas tij, përmbysje të tilla si ndaj Volfsburgut vështirë të ndodhin dy herë në këtë aktivitet.
“Champions League nuk të jep një mundësi të dytë. Nëse Madridit do t’i duhet një tjetër pëmbysje në gjysmëfinale, do të jetë shumë e vështirë.”
Takimi i parë gjysmëfinal mes Mançester Sitit dhe Realit të Madridit do të luhet në Angli më 26 prill, e ai i kthimit është lënë për më 4 maj. /tesheshi.com/
