Aleati i besuar i Bashës, Fatmir Mediu po udhëheqë negociatat e fundit me mazhorancën dhe ndërkombëtarët. Platforma e McAllister vijon të jetë në fuqi. Ja rrugët si mund të dilet në një marrëveshje…
Kur duket se gjithçka ka marrë fund ka lindur një dritë në fund të tunelit. Presioni i ndërkombëtarëve dhe presioni i brendshëm në PD kundër bojkotit të zgjedhjeve, ka bërë që të rihapen negociatat mes palëve për një zgjidhje të re.
Burime nga opozita dhe mazhoranca bëjnë të ditur se platforma e zgjidhjes e ofruar një javë më parë nga i dërguari i Parlamentit Europian dhe pasardhësi i Angela Merkel, David McAllister, vijon të jetë në tavolinën e bisedimeve. Pra, do të ketë shtyrje zgjedhjesh dhe ndryshim të Kodit Zgjedhor që opozita të futen në zgjedhje, por nuk dihet akoma si do të zgjidhet “kushti i panegociueshëm” i Bashës për dorëheqjen e Ramës si kryeministër.
Shenjat e një kompromisi të ri
Negociatat mes palëve po i udhëheq aleati më i afërt i Bashës, kreui i PR-së, Fatmir Mediu, i cili pas një bisede të gjatë një ditë më parë me njeriun e besuar të Ramës, Ëngjëll Agasin, ka pasur sot një takim me ambasadorin amerikan në Tiranë, Donald Lu. Pas 1 orë e gjysëm bisedë me Lu, Media foli për “rrugë të arsyeshme” dhe “dialog”. “Të vazhdojmë dialogun për të mirën e vendit. Rruga më e arsyeshme është të gjejmë rrugët e dialogur. Gjithmonë ka shanse për dialog nëse do të mendojmë për vendim dhe jo për interesa për pushtetin”, tha Mediu.
Nën presionin e brendshëm në parti ku tre deputetë me peshë në këtë parti, JozefinaTopalli, Eduart Selami dhe Majlinda Bregu dolën kundër bojkotit, Basha mblodhi grupin parlamentar për të diskutuar mbi vendimin e opozitës. Grupin ai e kishte tejkaluar ashtu siç tejkaloi dhe forumet e tjera të partisë, kur vendosi të mos pranonte ofertën e Brukselit.
Ndërkohë, kreu i PD-së ndodhet dhe para një presioni nga aleatët e tij, të cilët nuk e kishin menduar që do të bojkotoheshin zgjedhjet kur hynë në çadër. Frika se qëndrimi jashtë zgjedhjeve do t’i asgjësojë si parti ka bërë që ato të mbështesin vazhdimin e negociatave.
Kreu i PAA-së, Agron Duka ka mbledhur sot grupin e kandidatëve të tij për deputetë të cilët kanë nisur fushatën që të diskutojë mbi vendimarrjen e mëtejshme.
Përpos të gjitha këtyre shenjave ka dalë përsëri në skenë presidenti akoma në detyrë, Bujar Nishani, i cili ka bërë thirrje për një tryezë dialogu.
“Edhe njëherë i kërkon kryeministrit të vendit dhe liderit të opozitës të ulen në tryezën e bisedimeve me vullnetin për kompromis, për të tejkaluar këtë situatë të vështirë për vendin. Presidenti Nishani ofron të gjithë gatishmërinë dhe angazhimin e tij institucional në shërbim të këtij dialogu”- thuhej në deklaratën e sotme të kreut të shtetit në ikje.
Vetë Basha ka hedhur disa propozime teknike mbi të cilat mund të bihet dakord në negociata. Ai rrëzoi kompromisin e arritur nga PD-PS në 2008-ën me Kodin Zgjedhor duke kërkuar ndryshimin e tij. Ai propozoi një sistem elektoral mazhoritar me 100 deputetë. “Do të mjaftonin 100 deputetë, çdo deputet do të ketë zonën e tij elektorale”- tha ai sot.
Mekanizmat ligjorë
Një kompromis politik do të kërkonte më tej dhe mekanizmat ligjorë për t’u konkretizuar. Fakti që anëtarët e opozitës në KQZ dolën kundër vendimit për të pranuar listën e kandidatëve për deputetë me datë 29 prill tregon se pikërisht kjo datë mund të përdoret për të rrëzuar gjithë procesin. Pritet që PD ta ankimojë në Kolegjin Zgjedhor si antiligjor këtë vendim të KQZ dhe nëse vendimi shpallej i paligjshëm procesi i regjistrimit rikthehet dhe bashkë me të dhe shtyrja e datës së zgjedhjeve. Nëse arrihet kompromisi për ndryshime në Kodin Zgjedhor, atëherë implementimi i tyre do të kërkonte sërish kohën e vet. /tesheshi.com/
