Deri më tani, janë gjetur 12 mbetje trupash të boshnjakëve të vrarë në një varr masiv të Vlasenicës gjatë luftës. Aty gjenden dhe dy gra.
Për dhjetë vjet u shpërndanë informacione të ndryshme rreth varrit masiv mbi vendbanimin e Tugovës, por gërmimet ishin vazhdimisht të pasuksesshme. Informacioni i fundit dhe i saktë erdhi nga një serb i cili tha se nuk donte ta mbante këtë krim në ndërgjegje më.
“Ne gjetëm trupat në vetëm 30 cm thellësi. Ne gjetëm dy lokacione, të palidhura me njëra-tjetrën, dhe ne supozuam se këto ishin 10 deri 12 mbetje mortore. Ne e dimë me siguri se këto viktima ishin të zonës së Vlasenicës nga viti 1992, ndoshta edhe nga kampi Sushica”, tha Murat Hurtiç, nga Instituti për Kërkimin e Personave të Zhdukur në Bosnje.
Mbetjet mortore janë të plota. Ndër viktimat ishin dy gra në moshën midis 40 dhe 60-vjeçare.
“Vumë re se ka dëmtime në kafka, gjoks, skelet, që tregon se bëhet fjalë për një lëndim shrapnel të shkaktuar nga një armë zjarri”, tha Vedo Tuco, një ekspert i mjekësisë ligjore.
“Është e rëndësishme që çdo familje të gjejë familjarët e vet, është e rëndësishme që të zbulohen varret masive për të ardhur deri te e vërteta dhe drejtësia, në mënyrë që ata që kryen krimet të sillen para drejtësisë”, tha Ramiz Salkiç, nënkryetar i entitetit të Republika Srpska, për ata që kryen krimet.
“E vërteta të cilën e nxjerrin varret është e rëndë, e dhimbshme dhe e hidhur. Por, kjo është e vërteta dhe kjo është me rëndësi. Prandaj, shpresojmë që e vërteta do të jetë ilaçi për të ardhmën tonë në këto treva”, shtoi Vahid Ef. Fazloviq, myftiu i Tuzlës.
Deri më tani, 1.300 njerëz janë gjetur dhe varrosur në zonën e Vlasenicës dhe më shumë se 500 prej tyre janë duke u kërkuar. Ky varr masiv, edhe pse i cekët, është i fshehur mirë. Ditët në vijim, ekipet do të vazhdojnë hulumtimet dhe gërmimet.
Përgatiti: Jeton Zenuni – /tesheshi.com/
