Një samit fetar në Azerbajxhan për ndryshimet klimatike, me kë u përfaqësua Shqipëria?

Në datat 5-6 nëntor 2024, qyteti i Bakusë po mirpret Samitin Global të Liderëve Fetarë në kuadër të COP29, një ngjarje me rëndësi të madhe që bashkon liderët fetarë dhe personalitetet më të larta nga mbarë bota për të diskutuar sfidat e krizës klimatike dhe rolin që besimet dhe fetë mund të kenë në përballjen me këtë kërcënim global.

Ceremonia e hapjes së samitit u kryesua nga Kryeministri i Azerbajxhanit, Ali Asadov, dhe ministri i Ekologjisë dhe Burimeve Natyrore, Mukhtar Babayev, të cilët theksuan përkushtimin e Azerbajxhanit ndaj mbrojtjes së mjedisit dhe angazhimin e vendit të tyre për të ndihmuar në adresimin e krizës klimatike në nivel global. Në këtë samit të nivelit të lartë pa marin pjesë liderë fetarë nga të gjitha anët e globit, të cilët ndanë perspektivat e tyre dhe diskutuan mbi rolin transformues që feja dhe dialogu ndërfetar mund të kenë për të ndërtuar një të ardhme më të gjelbër dhe më të qëndrueshme për planetin tonë.

Thelbi i diskutimeve gjatë  samitit është tema “Fetë për një Planet të Gjelbër”, e cila përfshin tematika të rëndësishme si ndikimi i ndryshimeve klimatike në jetën dhe mirëqenien globale, promovimi i ndërgjegjësimit mjedisor përmes organizatave fetare dhe besimit, dhe roli i dialogut ndërfetar për të luftuar efektet e krizës klimatike. Sesionet plenare të samitit adresojnë gjithashtu sfidat që konflikti dhe dhuna sjellin për mjedisin dhe nevojën urgjente për një qasje të unifikuar kundër ekocidit dhe dëmtimeve mjedisore.

Pjesëmarrja e liderëve fetarë nga bota ishte një dëshmi e rëndësisë së bashkëpunimit ndërkombëtar për çështjet mjedisore dhe të ardhmen e përbashkët të njerëzimit. Ky samit reflekton besimin se feja ka një rol të rëndësishëm për të luajtur në ngritjen e ndërgjegjësimit dhe në promovimin e politikave të qëndrueshme që mbrojnë planetin për brezat e ardhshëm.

Shqipëria, e përfaqësuar nga Dr. Arben Ramkaj, Kryetari i Qendrës së Bashkëpunimit Ndërfetar, ndau eksperiencën e saj të suksesshme në bashkëjetesën ndërfetare dhe përkushtimin për mbrojtjen e mjedisit në një kontekst fetar. Kjo pjesëmarrje përforcon angazhimin e Shqipërisë për të kontribuar në përpjekjet ndërkombëtare për mbrojtjen e planetit dhe për të ndërtuar ura bashkëpunimi mes qytetërimeve dhe besimeve për një të ardhme të qëndrueshme.

Përmes këtij samiti, COP29 po ashtu thekson rëndësinë e një platforme ndërkombëtare ku liderët fetarë dhe udhëheqësit politikë mund të bashkohen për të krijuar politika të reja dhe për të rritur përpjekjet për përballjen me një nga sfidat më të mëdha të kohës sonë – ndryshimet klimatike. /tesheshi.com/