Ekonomia gjermane iu rikthye rritjes në tremujorin e parë, ndërsa familjarët shpenzuan më tepër dhe aktivitetet e ndërtimit u rritën. Megjithatë qeveria paralajmëron se perspektiva ekonomike mbetet e dobësuar nga mosmarrëveshjet tregtare.
Produkti i brendshëm bruto (PBB) u rrit 0.4% në tremujorin e katërt, treguan të dhënat e Zyrës Federale të Statistikave, dhe kjo ishte edhe pritshmëria e tregut.
Ministri i Ekonomisë Peter Altmaier i tha Reuters se shifrat paraqesin një “rreze shprese” pas dy tremujorësh pa rritje, por është ende herët të bëhen parashikime të mëtejme.
“Mosmarrëveshjet ndërkombëtare të tregtisë janë ende të pazgjidhura. Ne duhet të bëjmë gjithë çka është e mundur për të gjetur zgjidhje të pranueshme që mundësojnë tregtinë e lirë, “tha Altmaier.
Shtetet e Bashkuara dhe Kina kanë ndezur këto ditë konfliktin e tyre tregtar, ndërsa Pekini këtë javë njoftoi tarifat e reja kundër importeve të SHBA, pasi Uashingtoni rriti taksat mbi importet kineze. Të dyja vendet janë tregje të rëndësishme për eksportuesit gjermanë, që do të thotë se tarifat po dëmtojnë edhe bizneset e tyre.
Presidenti i SHBA, Donald Trump këtë javë pritet të rrisë tarifat mbi importet evropiane të makinave, të cilat do të kenë një ndikim të drejtpërdrejtë në Gjermani.
Kancelarja Angela Merkel, përsëriti thirrjet për të mbështetur kompanitë duke ulur burokracinë dhe taksat. Ministri i Financave Olaf Scholz, gjithashtu ka rënë dakord për të ulur taksat e korporatave.
Zyra Statistikore tha se rritja ishte nxitur nga ndërtimi dhe rritja e shpenzimeve të familjeve. Investimet e korporatave në makineri dhe pajisje gjithashtu ndihmuan në rritje, ndërkohë që shpenzimet shtetërore ishin paksa negative.
Sinjalet e përziera
“Zhvillimi i tregtisë dërgoi sinjale të përziera ndërsa eksportet dhe importet u rritën në tremujorin e parë”, tha Zyra Statistikore, duke lënë hapur pyetjen nëse tregtia neto kishte një ndikim pozitiv në GDP-në e vendit.
Zyra do të publikojë të dhënat më të detajuara të rritjes javën e ardhshme, të cilat duhet të hedhin më shumë dritë mbi atë se cilët sektorë të ekonomisë kanë kontribuar në rritje dhe në çfarë mase.
Ata konfirmoi se ekonomia gjermane u ul me 0.2% në tremujorin e tretë të vitit të kaluar dhe u stagnua në të katërtën.
Eksportuesit gjermanë po luftojnë edhe me kërkesën e huaj të dobët dhe pasigurinë e shkaktuar nga largimi kaotik i Britanisë nga Bashkimi Evropian.
Qeveria përgjysmoi parashikimin e rritjes së saj në 2019 në 0.5% muajin e kaluar. Kjo do të shënonte një ngadalësim të mprehtë pas normave të zgjerimit prej 2.2% në 2017 dhe 1.4% në 2018.
Eksperti i ekonomisë Carsten Brzeski tha se shifrat e rritjes nuk duhet të jenë arsye për vetëkënaqësi.
“Në fakt, ekonomia ende ka nevojë për më shumë investime, si nga sektori privat dhe publik, si dhe nga reforma të reja strukturore”, tha Brzeski. /tesheshi.com/
