Komisioni Evropian propozoi reformimin e tregut farmaceutik, pra reduktimin e kohëzgjatjes së procesit të miratimit dhe vendosjen e rregullave më të rrepta të raportimit për kompanitë farmaceutike.
“Duke krijuar një treg të vetëm të Bashkimit Evropian për barnat, propozimi synon të trajtojë sfidat e çmimeve të larta për trajtimet inovative dhe mungesat e barnave, si dhe dallimet në akses dhe çmime midis vendeve të BE-së”, tha ekzekutivi i BE-së në një deklaratë.
Ligji i ri do të përshpejtojë procedurën e miratimit të Agjencisë Evropiane të Barnave (EMA) në 180 ditë, nga mesatarja aktuale prej 400 ditësh.
Qëllimi është gjithashtu të lehtësohet përdorimi i barnave gjenerike duke reduktuar mbrojtjen rregullatore nga dhjetë në tetë vjet dhe duke shkurtuar procedurën për marrjen e një licence marketingu për një markë të re me të njëjtën formulë të përbërësit aktiv.
Rregulla për të shmangur mungesat
“Përveç kësaj, të drejtat e ekskluzivitetit të tregut do të mund të zgjaten deri në 12 vjet nëse kompanitë e zhvillimit vendosin të lançojnë ilaçe në të gjitha vendet e BE-së ose nëse ilaçi i përgjigjet një nevoje mjekësore të paplotësuar”, sqaroi Komisioni.
Për të shmangur mungesat, ligji do të vendosë rregulla më të rrepta raportimi në industrinë farmaceutike dhe do të forcojë mandatin e EMA-s për të mbikëqyrur dhe koordinuar ndërmjet autoriteteve kombëtare dhe kompanive.
Propozimi forcon gjithashtu mandatin e KE për të futur masa ligjërisht të detyrueshme nëse kërcënohet furnizimi me ilaçe kritike.
Anëtarët e BE-së dhe Parlamenti Evropian ende nuk e kanë miratuar planin e reformës. /tesheshi.com/
