Një zjarr ka shpërthyer në një pyll të kontaminuar me radioaktivitet pranë termocentralit bërthamor të Çernobilit, thanë zyrtarët të mërkurën.
Rreth 20 hektarë po digjen brenda Zonës së Përjashtimit të Çernobilit, një zonë 30 kilometra rreth vendit të fatkeqësisë së vitit 1986, njoftoi Guvernatori i Rajonit të Kievit, Ruslan Kravchenko në Facebook.
Ai theksoi se nivelet e rrezatimit janë brenda kufijve normalë.
Më shumë se 200 zjarrfikës, përfshirë 50 ushtarë, po luftojnë zjarrin, njoftuan autoritetet lokale. Zjarri tashmë është vënë nën kontroll.
Ende nuk dihet shkaku i zjarrit, por rajoni i Kievit ka përjetuar temperatura jashtëzakonisht të larta dhe thatësirë gjatë periudhës së kaluar, gjë që rrit rrezikun e zjarrit. /tesheshi.com/
