Nga Mensur Krasniqi
Në kulmin e debatit mbi kryqin 50 metra të lartë që politika maqedonase po vendos në Butel të Shkupit, Ziadin Sela, njeriu që drejton Lëvizjen për Reforma në PDSH, ka ofruar një paketë zgjidheje politike për ta lënë të pangrehur simbolin e krishterë – e në këtë rast ortodoks – për të cilin shqiptarët nuk kanë fije dyshimi që është politiko-etnik, inatçor po ashtu, e aspak fetar.
Për Selën, nuk ka sens që BDI, aleat qeveritar i VMRO-së, të dalë e të bëjë gam-gam me protesta kundër kryqit, pasi sipas tij, kështu i bie që të protestojë ndaj vetvetes. Sipas Selës, j kryqi mund të largohet vetëm nëse BDI, PDSH dhe LSDM krijojnë qeverinë e re pa VMRO-në, ku siç thotë ai, “me ç’rast gjykatat do të marrin frymë më lirshëm dhe menjëherë do të bie vendimi antikushtetues i Këshilli të Butelit për kryqin.
Ai në profilin e tij në facebook shkruan kështu:
“Ka një form më të thjeshtë se protesta që paralajmëron BDI për të ndalë partizimin dhe keqpërdorimin siç thonë ata (BDI) të simboleve fetare.
1. Ali Ahmeti i bën një telefonatë Menduh Thacit.
- Të dy këto bashkë e thërrasin Zoran Zaevin.
- Shkojnë në parlament bashkë me deputetët e tyre dhe bëjnë shumicë të re parlamentare
- Zgjedhin qeveri të re pa VMRO brenda.
- Gjykatat marrin frymë më lirshëm.
- Pero Latinovski e shumë të tjerë si ky, marrin padi penale për keqpërdorim detyre.
- Bie vendimi i këshillit të Butelit për shkak se është antikushtetues.
- Kryqi nuk bëhet.
Kjo është forma, të tjerat janë dyftyrësi dhe hipokrizi e BDI-së”,
ka shkruar Sela.
Ndryshe, pas takimit të përbashkët të të gjithë kryetarëve të degëve të BDI-së në rajonin e Shkupit, dje është marrë vendim unanim që të enjten të mbahet protestë popullore kundër vendosjes së kryqit në Butel.
“Sonte në selinë e Bashkimit Demokratik për Integrim në Shkup, drejuesit e të gjitha degëve të kryeqytetit të Dardanisë, bashkë me anëtarët e Kryesisë Qëndrore të BDI-së, demonstruan unitet dhe përkushtim të përbashkët për të kundërshtuar keqpërdorimin e simboleve fetare për qëllime politike dhe partiake. Andaj, ne të gjithë bashkarisht, ftojmë të gjitha mediat, shoqërinë civile dhe qytetarët që ta kundërshtojmë njëzëri proektin përçarës dhe nxitës në Komunën e Butelit. Protesta paqësore do të mbahet nesër, e enjte, më 3 mars 2016, para Komunës së Butelit”, thuhet në kumtesën e BDI-së-Shkup.
Para disa ditësh kur u vendos gurthemeli i kryqit gjigant, gjithashtu kishte një tentim që nëpërmjet protestës të ndalohet vënia e këtij gurthemeli, por kjo dështoi pasi në të ashtuquajturën “protestë” dolën vetëm disa dhjetëra funksionarë dhe aktivistë të BDI-së, ndërsa qytetarët nuk e përkrahën atë duke e akuzuar BDI-në se po bën skenare parazgjedhore me partnerin e tyre VMRO për poena politike.
Këta funksionarë nuk u lejuan nga policia as të afrohen tek vendi ku vihej gurthemeli dhe pas pak çastesh u shpërndanë.
Kujtojmë që punimet për bazamentin e kryqit po zhvillohen me intensitet të përshpejtuar. /tesheshi.com/
