Dy ligjbërës të Dumës ruse, Ivan Nikitçuk dhe Nikolaj Arefjev, kanë përgatitur një projektligj që e ndalon çdo demonstrim publik të orientimit seksual jotradicional, e që parashikon dënim me gjobë apo dhe arrestim për shkelje të këtij ligji.
Një shënim shpjegues i bashkangjitur draftit të dy deputetëve thotë se nëse kjo shprehje e seksualitetit merr formën e “demonstrimit të parapëlqimeve të shtrembëruara seksuale në vendet publike,” ajo duhet dënuar me gjoba që variojnë nga 4.000 në 5.000 rubla, dhe nëse kjo bëhet në institucionet edukative dhe kulturore, apo në zyrat e shtetit, duhet të ketë dhe ndalim gjer në 15 ditë të personit apo personave.
Nikitçuk ka folur për të përditshmen Izvestia, ku ka deklaruar, “Unë mendoj se problemi është i rëndë dhe urgjent, sepse ka të bëjë me sëmundjet sociale të shoqërisë sonë dhe me edukimin moral të brezit të ri.”
Ai e ka konsideruar homoseksualitetin një “rrezik të madh për çdo person normal, e për njerëzimin si një të tërë”. “Në një kuptim biologjik, dështimi për të riprodhuar është njëlloj si vdekja, dhe kjo e bën homoseksualitetin një rrezik vdekjeprurës për njerëzimin.” /tesheshi.com/
