Raportet e kryeministri Rama me faktorin politik të Prishtinës, si dhe me atë shoqërisë kosovare në përgjithësi, kanë përftuar dikotominë dashuri – urrejte. Kështu dhe në rastin e fundit, me prezencën dhe qëndrimet e tij gjatë ditëve te jubileut të Pavarësisë. Pasi u kap me Haradinajn për Demarkacionin, ai u përkujdes që në ditën e pavarësisë të ndez një “luftë” të re; kjo pasi doli me idenë për një President gjithëkombëtar, dhe gjithashtu për një politikë të unifikuar kombëtare të sigurisë. Këto dy propozime Rama i bëri gjatë fjalimit në Kuvendin e Kosovës.
E pranoi se një ide e tillë nuk është e realizueshme tash, po tha se edhe dicka që ëndërrohet mund të realizohet.
“Mbase ky parafytyrim sot mund të mos jetë i qëllueshëm në rrafshin e racionales, por historia na këshillon se çka është e drejtë të ëndërrohet nuk është e pamundur të realizohet”, ka shtuar ai
Dhe pas këtij deklarimi nuk vonuan reagimet nga Kosova, ku parti opozitare e njohës të rrethanave politike, drejtuan kritika të mëdha ndaj Ramë.s
LDK-ja e Isa Mustafës e ka quajtur idenë e Ramës si mosrespekt ndaj Kosovës.
Avdullah Hoti, shef i grupit parlamentar të LDK-së thotë se “një propozim i tillë është mungesë respekti për aspiratat e kosovarëve për shtet të pavarur dhe të integruar në BE dhe NATO”.
Më i ashpër ka qenë profesori universitar, Milazim Krasniqi, i cili e quan Ramën të pabesë dhe iniciativat e tij i sheh me qëllim ta dobësojnë shtetin tone.
“Edi Rama është aventurier. Është përçarës. Është i pabesë. Të tilla i ka të gjitha iniciativat e deritashme në drejtim të Kosovës. Të tillë e pati propozimin edhe sot në Prishtinë. (Sapo BE-ja e ka veçuar nga Serbia rrugën e Kosovës drejt integrimit, ky tipi synon ta mjegullojë e të mbulojë atë rrugë me dilema të tjera.Synon të frikësojë BE-në, me gjoja ‘qëllimet e fshehta’ të Kosovës!!!) Pra, iniciativat e tij kanë vetëm një qëllim: të dobësojnë shtetin tonë e të inkurajojnë armiqtë e tij. Qaq. Prandaj askush nuk duhet ta marrë seriozisht, asnjë propozim të Ramës. As këtë të fundit, sepse edhe ky është hileqar”, shkruan Krasniqi në Facebook.
Kurse avokati Dastid Pallaska, thotë se Kosova dhe Shqipëria në dekadën e ardhshme mund të krijojnë vetëm një institucion që mund t’i pensiononte patriotët e karrierës.
“Të vetmin institucion të përbashkët që munden me e kriju Kosova dhe Shqipëria në 10 vitet e ardhshme është një “dhomë e lartë e dy parlamenteve” ku do të kishin mundësi me u pensionu të gjithë patriotat e karrierës nga të dy vendet. Për seli mundemi me bisedu. Është Dyzi por edhe Burreli nuk është vend i keq”, shkruan Pallaska në FB.
Deri pak vite më parë, tek shqiptarët e Kosovës e ata të Maqedonisë, Rama shihej si “mish i huaj” në gjykimin folklorik. Nisur nga emri dhe prejardhja e tij fetare pa konotacion kombëtar (Para tingëllimit Salë, ai Ed nuk u thoshtë asgjë dhe kaq mjaftonte si argument), Rama mbetej shumë i largët, gjithnjë në raport me Berishë. Por ndryshimi i konteksteve politike e ndryshoi këtë raport. Tashmë Rama është bërë pjesë e qenësishme e politikës kosovare, deri në pikën sa ngjall dhe bezdi…kur u futet në sinore. /tesheshi.com/
