Një person është arrestuar në lidhje me vrasjen e imamit musliman dhe ndihmësit të tij jashtë një xhamie në qytetin e Nju Jorkut.
Zyrtarët thonë se Oscar Morel, 35 vjeç, është ngarkuar me dy akuza, për vrasje dhe posedim kriminal të një arme.
Zyrtarët e policisë e kanë arrestuar të dyshuarin natën e së dielës në një apartament në Bruklin, teksa po i ofrohej veturës së tij. Ndërkaq, është ngritur një aktakuzë ndaj tij të hënën në mbrëmje.
Më herët, të hënën, është zhvilluar ceremonia e varrimit të imamit Maulama Akonjee dhe e ndihmësit të tij, Thara Udin, të cilët shërbenin në xhaminë Al-Furqan Jame në Queens të Nju Jorkut.
Qindra muslimanë nga i gjithë qyteti morën pjesë në ceremoninë e varrimit. Agjencia e lajmeve Reuters bëri të ditur se pjesëmarrësit që e morën fjalën kërkuan nga organet e rendit që t’i hetojnë vrasjet si krim urrejtjeje, e t’i shtojnë përpjekjet për t’i mbrojtur ato pjesë të qytetit ku jetojnë dhe punojnë shumica e muslimanëve.
Frekuentuesit e xhamisë, e cila në masë të madhe u shërben emigrantëve nga Bangladeshi, janë të bindur se ky është krim urrejtjeje. Ata thonë se nuk ka patur ndonjë motiv tjetër të mundshëm për këtë sulm. /tesheshi.com/
