Këshilltari i përfaqësuesit special të Bashkimit Evropian për dialogun në Bruksel, Christian Ramet, tha të mërkurën se BE-ja po kërkon nga Serbia dhe Kosova që të fillojnë zbatimin pa vonesë të Marrëveshjes së Ohrit dhe të gjitha marrëveshjeve të tjera të arritura.
Duke folur në Samitin për Paqe dhe Demokraci, i cili po mbahet në Prishtinë, ai tha se Marrëveshja e Ohrit është një arritje historike dhe se zbatimi i saj do t’i hapë rrugën Kosovës.
“Agresioni rus kundër Ukrainës na ka treguar se është koha për zgjerimin e BE-së. Kur të zbatohet Marrëveshja e Ohrit, do të hapen mundësi që nuk ka pasur më parë dhe do të jetë e dobishme për Kosovën. Besoj se kjo është arritja më e madhe e dialogut deri tani. Por duhet të fillojë zbatimi i marrëveshjes [Ohrit] dhe anekseve”, tha Ramet dhe kujtoi se marrëveshja e Ohrit është në fuqi, por nuk është bërë asnjë përparim.
Sipas vlerësimit të tij, ka humbur shumë potencial në menaxhimin e krizave dhe në procesin e de-përshkallëzimit.
“Kur ka tensione, nuk ka vend për dialog dhe normalizim. Ajo që pret BE-ja është zbatimi, sigurisht. BE-ja kërkon nga palët që pa vonesë të fillojnë zbatimin [Marrëveshjen e Ohrit] dhe të gjitha marrëveshjet e tjera”, tha Ramet.
Deklarata e tij u mbështet nga Cynthia Cook nga Ambasada Amerikane në Kosovë, e cila tha se “SHBA është mbështetësi më i madh i Kosovës”.
“Ne duam ta shohim Kosovën në NATO dhe e vetmja rrugë është dialogu. Duhet të formohet një bashkësi komunash me shumicë serbe [në veri të Kosovës]. Në këtë mënyrë Kosova do të çlironte potencialin e saj të plotë”, tha Cook. /tesheshi.com/
