Një forcë politike kryesore në vend pritet që t’i bëjë ftesë kryeprokurorit të përgjithshëm Adriatik Llalla që të hyjë në politikë, duke u vendosur në listën për deputetë për zgjedhjet e 18 qershorit.
Një burim diplomatik i tha tesheshi.com se ka informacione të qarta që kreu i organit të akuzës do ta përdorë politikën si një vend mbrojtjeje pas asaj që ka ndërmarrë jo vetëm dy ditë më parë, por prej dy vjetësh, duke kundërshtuar dhe duke u përplasur për reformën në drejtësi.
Do të përdoret pikërisht modeli i Arben Ristanit, i cili për t’u ruajtur nga ndonjë përplasje politike me Edi Ramën, të cilit i hoqi mandatin e kreut të bashkisë së Tiranës në vitin 2011 me një vendim tejet të kontestuar të KQZ-së, u katapultua hiç më pak se në postin e sekretarit të përgjithshëm të PD-së dhe të deputetit, duke mos pasur asnjë ditë histori politike me Partinë Demokratike.
Kryeprokurori i përgjithshëm Adriatik Llalla ka marrëdhënie të mira me ish-kryeministrin Sali Berisha dhe me kryetarin e Parlamentit Ilir Meta. Por ende nuk dihet se kush do t’ia bëjë ofertën i pari, pasi përveç opozitës, edhe LSI-ja mësohet se është gati ta ofrojë brenda vetes së saj kryeprokurorin, sidomos në rast traume politike me Partinë Socialiste.
Deklaratat e mbrëmshme të Llallës nuk ishin gjë tjetër, veçse një retorikë e pastër politike, që duket se kanë shënuar gurin e parë kilometrik drejt një rrugë të re të Adriatik Llallës si individ.
Dhe bëhet fjalë për një rrugë të shënuar qartë dhe me një vend jo të ulët në hierarkinë e ardhshme politike. Asnjë prokuror nuk ka arritur deri më sot të hyjë në një nivel kaq të fuqishëm përplasjesh me deklarata si me ambasadorët e Perëndimit, ashtu edhe me mazhorancën. Zakonisht një prokuror flet pak dhe vepron shumë!
Por deklarata e djeshme e Prokurorisë së Përgjithshme, që e akuzonte ambasadorin Donald Lu për “hakmarrje sorosiane” nuk linte dyshime, pasi tregonte qartë retorikën tipike politike që është përdorur nga opozita dhe LSI-ja ditët e fundit, pas betimit të presidentit të ri të SHBA-së, Donald Trump.
Fundja, ç’i duhen një prokurori të përgjithshëm lëvizjet sorosiane apo trampizmi politik. Ato janë tema të politologjisë dhe analizës mbi zhvillimet botërore, dhe nuk kanë aspak të bëjnë me ndjekjen penale, si një detyrë që përcaktohet nga Kodi Penal dhe Kodi i Procedurës Penale.
Sot mblidhet Këshilli i Sigurisë Kombëtare, i thirrur për një çështje që ka të bëjë me axhendën e organeve ligjzbatuese për të arrestuar një të kërkuar të madh. Edhe pse i kërkuar nga kryetari i Kuvendit, duket se takimi që duhet të vendosë piketat për emergjencat kombëtare do të jetë më shumë propagandistik dhe në shërbim të qarqeve politike që mbështet presidenti Bujar Nishani, pra, opozitës.
Pritet që gjatë mbledhjes së Këshillit të kemi një rigjallërim të protagonizmit të kreut të shtetit, kryeprokurorit dhe kreut të Kuvendit, të cilët i përkasin një rryme politike që ka hyrë në përplasje me ambasadën e SHBA-së në Tiranë.
Këtij grupi politik duket se i është bashkëngjitur qartë edhe kryeprokurori i Republikës, Adriatik Llalla, i cili në 24 orët e fundit, gjatë sulmit ndaj ambasadorit amerikan në Tiranë, Donald Lu, ka folur pikërisht me gjuhën më të egër të opozitës shqiptare.
Përmendja e termit “guvernator” nga ana e Adriatik Llallës nuk është gjë tjetër, veçse përsëritja e akuzës së njëjtë që ish-kryeministri Sali Berisha ka bërë po ndaj ambasadorit Lu në parlament.
Mbetet për t’u parë nëse edhe me zotin Llalla do të ndiqet modeli i Arben Ristanit, i cili nga kryetar i KQZ-së u afrua në politikë, u emërua zv.ministër i Brendshëm, u zgjodh deputet dhe më pas edhe numri dy i Partisë Demokratike, pikërisht pas aferës që i dha në tavolinë bashkinë e Tiranës Lulzim Bashës. /tesheshi.com/
