Nga Blendi Gashi
“Alternativa Socialdemokrate”, sipas mediave kosovare do quhet partia e re që do i shtohet skenës politike. Kjo parti do jetë fraksion i Lëvizjes Vetëvendosje, pra do të formohet nga vetëvendosësit e pakënaqur, Visar Ymeri, Dardan Molliqaj dhe të tjerët të cilët dhanë dorëheqje nga pozitat në këtë parti ditë më parë.
Ndërsa nuk ka ende një konfirmim zyrtar prej tyre për shkëputjen përfundimtare nga VV dhe formimin e një partie të re, nga takimi i fundit që zhvilluan dy krahët, lanë të kuptohet se gjasat për të rrugëtuar në një çati janë pothuajse minimale.
Më konkreti ishte Visar Ymeri, i cili tha se “nuk ka një përafrim dhe nuk di nëse do ketë”, ndërsa tha se zgjidhja e vetme do ishte nëse heqet dorë nga vetja për të mirën e organizatës, duke aluduar në tërheqjen e Albin Kurtit nga gara për kryevetëvendosës.
Ndërsa kjo nuk ka kurrfarë gjase të ndodhë, pasi Kurti veç ka nisur të shpalos platformën në të gjitha qytetet, ndarja së shpejti do troket.
Pas ndarjes Ymeri dhe të tjerët do fillojnë nga zeroja ku do matën me Kurtin, sigurisht me parti të ndryshme.
Dhe duke parë se jo pak parti janë formuar në vitet e fundit dhe suksesi i tyre ka qenë tejet i mangët, duke marrë 2% deri në 3% të elektoratit, shtrohet dilema nëse edhe ish-vetëvendosësit do të kalonin pragun zgjedhor në zgjedhjet e ardhshme nacionale, apo do t’i printe fati i partive tjera të vogla, pra do gjenin shpëtimin duke lidhur koalicione parazgjedhore me parti më t1% mëdha.
Ja ç’mendojnë analistët…
Shemsi Jashari, analist politik, mendon se partia evetuale e Ymerit mund ta ketë fatin e ish-partive tjera që kanë dalë si rezultat i ndarjeve.
Sipas tij, mentaliteti i votuesit kosovar është i lidhur me figurën qendrore – liderin dhe çdo tentim për të bërë të kundërtën nuk gjenë mbështetje tek elektorati i gjërë.
“Duke parë në histroikun e deritashëm të ndarjes së partive asnjëra nga ato fraksione apo ndarje nuk ka pasur sukses afatgjatë. E njejta mund t’i ndodhë edhe Visar Ymerit me shokë nëse ndahen. Rezultati kryesor është një dobësim dhe goditje e madhe për Vetëvendosjen pas ndarjes, duke e kthyer në një subjekt të vogël dhe pa ndikim. Duke qenë se grupi i të pakënaqurve me mandat deputeti është bukur i madh edhe mund të kenë një ndikim në kuvend, mendoj se në rastin më të mirë mund ta kaloj pragun në zgjedhjet e ardhshme”, thotë Jashari për tesheshi.com.
Leon Duhanaj, njohës i rrethanave politike thotë se mbijetesa e një prtie të re, këtë rast të formuar nga të pakënaqurit e Vetëvendosjes varet nga pazaret eventuale që mund t’i bëjnë me parti më të mëdha në prag zgjedhjesh.
“Se a do mbijetojnë në politikë si të vetëm, varet shumë nga rrethanat. Grupi i të pakënaqurve ka humbur identitetin politik, duke qenë patericë në Vetëvendosje. Tani do të mundohen të krijojnë një identitet të ri. Por, sa do të jenë të besueshëm dhe sa do ja dalin, është pyetje tjetër. Mbijetesa e tyre do të varet nga konstalacionet politike në vend. Mer shembull AKR-në. Edhe ata, si shumë të tjerë, nuk do mbijetonin, nëse nuk kishin më qenë interesat e subjekteve tjera, për t’i përdorur si paterica. Edhe ky grup , për mendimin tim , do të flirtpj më ndonjë parti të madhe. Megjithatë çelësi do jetë, se si dhe sa do të reformohet PDK”, thotë Duhanaj për tesheshi.com.
/tesheshi.com/
