Qeveria e përkohshme talebane në Afganistan u bëri thirrje Shteteve të Bashkuara të ndalojnë shkeljen e hapësirës ajrore afgane për të parandaluar pasojat negative.
Zëdhënësi i qeverisë talebane Zabihullah Mujahid bëri një deklaratë, duke thënë se sulmet e dronëve amerikanë brenda Afganistanit ishin një shkelje e sigurisë kombëtare.
“Kohët e fundit kemi parë që Shtetet e Bashkuara shkelin të gjitha të drejtat ndërkombëtare, ligjet dhe detyrimet e saj ndaj Emiratit Islamik (Afganistan) në Doha, Katar, ndërsa hapësira e shenjtë ajrore e Afganistanit po sulmohet nga dronët amerikanë,” tha Mujahid, duke i kërkuar Uashingtonit t’i japë fund shkeljet.
Dhjetë persona u vranë në sulmin me dron
Mujahid theksoi se shtetet, sipas ligjit ndërkombëtar, janë pronarët e vetëm të sovranitetit të tyre territorial dhe ajror.
“Prandaj, Emirati Islamik, si i vetmi person juridik në Afganistan, është ruajtësi i tokës dhe hapësirës ajrore të Afganistanit. Ne u bëjmë thirrje të gjitha vendeve, veçanërisht Shteteve të Bashkuara, që ta trajtojnë Afganistanin nën dritën e të drejtave, ligjeve dhe detyrimeve ndërkombëtare, duke marrë parasysh respektin dhe detyrimet reciproke, në mënyrë që të parandalohen çdo pasojë negative”, shtoi zëdhënësi taleban.
Talibanët kapën Kabulin muajin e kaluar dhe njoftuan formimin e një qeverie të përkohshme në shtator, pasi trupat amerikane u larguan nga vendi më 31 gusht.
Më 29 gusht, Shtetet e Bashkuara kryen një sulm me dron në automjetin e punonjësit humanitar Zamari Ahmadi, me dyshimin se ishin të lidhur me ISIL.
Më 17 shtator, Shtetet e Bashkuara pranuan se dhjetë civilë u vranë në sulm, përfshirë një punonjës humanitar dhe shtatë fëmijë.
Familjet refuzojnë “ngushëllimet dhe faljen” e SHBA
“Ne tani vlerësojmë se nuk ka gjasa që automjeti dhe ata që u vranë ishin të lidhur me ISIL ose ishin një kërcënim i drejtpërdrejtë për forcat amerikane,” tha shefi i Komandës Qendrore të SHBA, gjenerali Frank McKenzie.
McKenzie shprehu “ngushëllimet e thella” për familjet e viktimave dhe tha se sulmi u krye “me besimin serioz se do të parandalonte një kërcënim të menjëhershëm për forcat tona dhe ata të evakuuar në aeroport”.
Familjet e atyre që u vranë në sulmin me dron refuzuan “ngushëllimet dhe faljen” amerikane, duke e quajtur atë një krim lufte dhe duke kërkuar drejtësi sipas ligjit ndërkombëtar. /tesheshi.com/
