Një pakt trepalësh kundër Turqisë?

Egjiptin, Greqinë dhe Qipron i bashkon diçka më shumë sesa krizat ekonomike të brendshme, pasi këtu është edhe armiqësia ndaj Turqisë, gjë e cila i ka bërë qarqe të caktuara në Izrael të flasin për formimin e një unioni trepalësh mes këtyre shteteve, nga i cili do të ketë përfitim vetë Izraeli.

Udhëheqësit e tri shteteve, Egjiptit, Greqisë dhe Qipros, u takuan ditë më parë në Nikozia, për herë të dytë në gjashtë muajt e fundit,  ku diskutuan  mbi interesat e përbashkëta ekonomike dhe ato të sigurisë.
Qarqet izraelite theksojnë se ky takim ka patur një tjetër qëllim, të pashfaqur në opinion, të lidhur me formimin e një qendre të rezistencës ndaj Turqisë, prej së cilës do të përfitojë në mënyrë të tërthortë Izraeli.

Ndërsa në njoftimin zyrtar të të tre vendeve theksohet se qëllimi i takimit ka qenë diskutimi i çështjeve të “luftës kundër terrorizmit, shfrytëzimit të gazit në Mesdhe, dhe vazhdimit të bisedimeve politike ndërmjet Izraelit dhe Autoritetit Palestinez,” komentatori izraelit Ron Ben-Yishai i tha rrjetit mediatik  Al Jazeera se këto tre shtete ndajnë dëshirën e përbashkët për të formuar një front në rajonin e pellgut të Detit Mesdhe për t’i bërë ballë Turqisë, armikut të përbashkët.

Ai po ashtu ka theksuar se Izraeli nuk ka qenë pjesë e këtyre bisedimeve në Nikozia  për shkak të marrëdhënieve të këqija me qeverinë e re greke, por i shfrytëzon  prapaskenat që kjo qendër rezistence të kristalizohet, sepse ka arsyet e veta, nga të cilat më e rëndësishmja është qëndrimi i Ankarasë në konfliktin me palestinezët dhe lëvizjen Hamas.

Qendrat paralele të fuqisë

Portali informativ izraelit Walla citoi një burim të paidentifikuar grek që thotë se “qëllimi më i rëndësishëm i samitit në Nikozia është formimi i një koalicioni kundër Turqisë. Greqia është e shqetësuar se Turqia i lejon përkrahësit e ISIS-it, Shtetit Islam të Irakut dhe Levantit, të kalojnë lirisht në territorin e saj, në rrugën e tyre për në Siri dhe Irak, duke parë kështu një rrezik të dyfishtë, ngaqë është një vend fqinj.”

Studiuesi izraelit për Lindjen e Mesme, Roni Shaked, i deklaroi rrjetit mediatik Al Jazeera se është diskutuar bashkëpunimi trepalësh i lartpërmendur, i cili ka filluar në fund të vitit të kaluar,  me qëllim formimin e një qendre që do t’i kundërvihet Turqisë, për të cilën thonë se ndikon negativisht në rajon.

Ai shton: “Ka edhe interesa ekonomike, armiq të përbashkët, dhe përçarje historike midis Turqisë dhe Qipros rreth pjesës turke të vendit, gjë e cila ka zgjatur për dyzet vjet, ndërsa El-Sisi sheh te Ankaraja kërcënimin për stabilitetin e Egjiptit për shkak të mbështetjes që ajo i dha Vëllazërisë Myslimane kundër grushtit të shtetit.”

Ai shpjegon se, “Izraeli inkurajon fshehurazi zhvillimin e kësaj qendre antiturke dhe punon në fshehtësi për forcimin e saj, sepse është përfituesi më i madh në të tërë këtë”, ndërsa thotë se shteti izraelit e përkrah El-Sisin përkundër presionit amerikan.

Paralajmërimet

Ish-ambasadori izraelit dhe ligjërues në Universitetin e Tel-Avivit, Alon Liel, beson se ka pak të ngjarë të formohet një koalicioni kundër Turqisë, për shkak të fuqisë të këtij vendi në të gjitha fushat, në dallim nga kundërshtarët në pellgun e Detit Mesdhe.

Ai shton me sarkazëm se, “Turqia mund t’i hajë këto tri shtete me një gëlltitje.”
Alon Liel është i mendimit se Greqia nuk do të marrë pjesë në koalicionin kundër Turqisë, për arsye se qeveria e saj e re ka qasje armiqësore ndaj Izraelit.